Сумар дня на 15. марця 2024 р.

Приносиме вам сумар медияльной ґрупы ЛЕМ.фм+ на ден 15. марця 2024 р.

Велика хвиля для шлезской меншыны

Як поінформувал Рух Автономіі Шлезска, вчера, 14. марця 2024 р., Европейскій Трибунал Прав Чловека в Штрасбурґу опубликувал вырок в справі Стоваришыня Осіб Шлезской Нацийональности. Трибунал узнал, што польскы суды порушыли 11. артикул Конвенциі о Охороні Прав Чловека і Основных Свобід, ґарантуючый право до свобідного стоваришаня ся. Тым самым завершыла ся зачата Рухом Автономіі Шлезска в 1996 р. борба о пошануваня свободы творіня стоваришынь осіб декляруючых шлезску нацийональніст. Вельо років працы принесло заміряный результат. То велика хвиля для привязаных до свойой достоменности Шлезаків.

Нова атракция в Тыличы

В Тыличы буде пляжа. Атракция над потоком Мохначнка має быти доступна уж в літнім сезоні, земельны роботы уж рушыли. Як подал бургомайстер ґміны Крениця, пляжа єст реализувана з шыршой дотациі, разом з інчыма інвестициями, такыма як пляцы забав і боіско в Полянях, перебудова пристанку і розбудова студні на рынку в Тыличы. Не буде то перша того типу атракция в ґміні Крениця. Єдна пляжа находит ся уж над Чорным Потоком, котого корыто было в тій ціли специяльно поглублене. Пляжа в Тыличы буде барже рекреацийна, а потік Мохначка не буде поглубленый, зато што люде ходят там імати рыбы.

Де вышмарити лікы по терміні?

Звязок Ґмін Мідьового Басену припоминат, што повинны сме робити з ліками по терміні. Як підкрислят підінспектор дс. еколоґічной едукациі Маґда Сітницка, предовшыткым треба собі усвідомити, же лікы то небезпечны одпады, зложены з хімічных звязків, котры в ріжный спосіб можут діяти на натуральне середовиско. Вымітуваня старых ліків до смітя або єст неодповідальне. Звязкы заверты в медицинах сут барз тырвалы, достаючы ся до воды або землі можут іх заказити. Не мож тіж вымітувати ліків до тоалеты. Очыщальні не радят собі добрі з такыма субстанциями, а іх пристутніст в воді спричынят, же бактериі і вірусы стают ся на них одпорны. Зато лікы по терміні повинны быти підданы професийональній утилизациі. Жебы мож было тото зробити в спосіб безпечный для середовиска, люди і звірят, мусят быти збераны окремо, до специяльных поємників, котры находят ся в даякых закладах здоровля і аптиках. На обшыри Звязку мож тіж занести стары лікы до Пунктів Селективного Збераня Комунальных Одпадів, в Польковицях при ул. Дзялковій 18.

Загальне зобраня членів Стоваришыня «Руска Бурса» і авторска стріча з Петром Медвідьом

А на конец припоминаме, што заран, в суботу 16. марця, одбуде ся загальне зобраня членів Стоваришыня «Руска Бурса» в Ґорлицях. Згідно зо статутом Стоваришыня, загальны зобраня одбывают ся раз на рік. Одобраный буде справопис з діяльности заряду за 2023 р. і выбраны власти на нову річну каденцию. Загальне засіданя членів то тіж нагода, жеби вести бесіды на тему дальшой діяльности орґанізациі і єй пріоритетів на будуче. В тот сам ден заплянувана єст і технічно-орґанізацийна стріча членів редакциі радия і порталю ЛЕМ.фм, а на 17.00 год. запрашаме вшыткых на авторску стрічу з Петром Медвідьом – як раз Стоваришыня «Руска Бурса» в Ґорлицях печатало осіню минулого рока дебютантску збірку поезиі нашого редакцийного колеґы пн. «синьов країнов». Бесіду модерувал буде Петро Мурянка.

Дзжерело фотоґрафіі: FB Ruch Autonomii Śląska