Засідал Собор ПАПЦ. Рішено справу святкувань 100. річниці автокефалиі

5. марця під ведіньом митрополиты варшавского і цілой Польщы Савы засідал Собор Єпископів Польской Автокефальной Православной Церкви (ПАПЦ). В рамках засіданя владыкы рішыли так зовнішні, як і внутрішні темы повязаны з жытьом православной церкви.

Серед рішеных справ были і такы, якы тыкают православных Лемків, в тым поєдных лемківскых парохій.

Святкуваня 100. річниці автокефалиі

В комунікаті оприлюдненым на вебсайті ПАПЦ чытаме, што з зовнішніх тем Собор розмотріл писма константинопольского, александрийского і московского патріархів, якы односят ся до загальноправославной ситуациі. Дальше бесідувано о науково-богословскій спілпрацы з учельнями на Кіпрі і в Грециі. Владыкы дискутували тіж о спілпраци ПАПЦ з Конференцийом Европейскых Церкви.

Єдном з головным тем внутрішніх справ розмострюваных на посліднім засіданю была тема святкувань 100. річниці од отриманя ПАПЦ автокефалиі. Собор принял проґрам подій, якій буде окремо оприлюдненый. В тій справі принято тіж текст посланя Собору в зязку з 100. річницьом автокефалиі.

Собор рішал і дальшы темы, м.ін. односячы ся до проведіня канонізациі люди замученых в лаґрах, зверніня ся до власти в справі захованя дотеперішньой працы Костельного Фундушу і навчаня реліґіі в школах. Владыкы приняли справописы з діяльности поєдных єпархій, монастырів і Братства Православной Молодежы в 2023 р. Рішено, што Ден Православной Молодежы 2025 буде святкуваный центрально в Варшаві. Серед того владыкы приняли текст пасхального посланя до вірных.

Нагороды і збіркы

Єдном з внутрішніх тем посліднього засіданя Собору было принятя рішыня о признаню пасхальных нагорід для духовных і світскых осіб.

Серед нагородженых священників сут єґомості, якы служат на лемківскых парохіях. Право ношыня другого наперсного креста отримал о. митр. Василь Ґальчык, бывшый парох Крениці, теперішній резидент парохіі в Ґорлицях.

Удостоєны правом ношыня митры были м.ін. о. Любомир Воргач (парох Ліґниці), о. Андрий Ґрич (парох Кунковы, Ліщын і Білянкы) і о. Артур Грабан (парох Лугів, Березы і полнячый обовязкы пароха в Валчу). Крест з украшынями отримал ігумен Юрий (Омелянюк), настоятель парохіі в Бучыні.

Затверджено тіж загальномитрополитарны збіркы, серед них на перебудову церкви в Студзьонках на західніх землях Польщы (листопад/новембер 2024 р.), ремонт єпархіяльного будинку при церкви в Ґорлицях (січен/януар 2025 р.), будову православной церкви (каплиці) на Святій Горі Явір на Лемковині (лютый/фебруар 2025 р.), ци ремонт церкви в Ліщынах (марец 2025 р.) і Дюрдьові (квітен/апріль 2025 р.).