До Книгы рока ПСК мож голосити і русиньскы публікації

Як інформовало Одділіня комунікації Пряшівского самосправного краю (ПСК), крайска самосправа вєдно з Крайсков бібліотеков Павла Орсаґа Гвієздослава і реґіоналныма бібліотеками в Попраді, Левочі, Воронові над Топльов, Гуменнім, Свіднику, Бардейові і Старій Любовні выголосили 7-ый рочник чітательского конкурзу Книга рока ПСК.

Книгы, котры мож приголосити до конкурзу, мусять як звычайно мати повязаня з реґіонами ПСК, і то темов або особов автора текстовой ці образовой части.

„Крайскый чітательскый конкурз тішыть ся піднимаючому інтересу, што нас барз тішыть, бо в літературній творчости бізовно маєме ся чім похвалити,“ повів в повязаню із актуалным рочником конкурзу Книга рока ПСК 2023 Мілан Маєрьскый, пряшівскый жупан.

Конкурз за його думками помагать пропаґації і підпорі выдаваня реґіоналной літературы, є єдночасно вдяка ньому веце видіти книжковы творы, котры суть скапчаны з Пряшівскым крайом. „То про нас барз файна реклама, бо книжка є дашто, што навсе заховать ся про далшы ґенерації,“ повів председа ПСК Маєрьскый.

Чітателі з Пряшівского краю, але і зоставователі, редакторы, выдавателі, книгкупці, дістрібуторы книжок ці бібліотекы а авторы можуть тіпы на тоту нагороду передкладати в пятьох катеґоріях. Конкретно іде о катеґорії Белетрія про діти і молодеж, Белетрія про дорослых, Научна література і Популарно-научна література.

Послідньов катеґорійов, до котрой мож книжкы приголосити, є Україньска і русиньска література. Номіновати мож книгы, котры были выданы в роках 2022 і 2023.

Меджі номінації будуть зараджены выключно друкованы книгы – ґрафічно і книжково оброблены до вязаной або брожованой публікації, котра має приділене ISBN. Передкладателі номінацій мусять два выдрукованы фалаткы доручіти особно до своїх реґіоналных бібліотек. Єдночасно мусять выповнити електронічный формуларь, котрый найдуть на офіціалнім сайті ПСК.

Номінації спустили ся 4-го марца 2024-го року, а послідній день на поданя номінації є 30-ый апріль.

Як інформують орґанізаторы, номінації буде оціньовати фахова журі. В каждій катеґорії уділить три місця. Так само передасть Премію публікы, о котрой переможцьови вырішыть онлайн чітательска анкета. Тота бы мала проходити од 1-го юна до 31-го авґуста. Святочне удільованя нагород одбуде ся в септембрі 2024-го року.

Жрідло фотоґрафії: Pixabay.com.