В церкви без телефону

В другій половині лютого/фебруара єпархы трьох єпархій Украіньской Грекокатолицкой Церкви в Польщы выдали декреты, в котрых наказуют хоснувати выключні друкуваны книгы вчас публичных богослужынь. В дальшых пунктах розпоряджыня пише ся о заказі хоснуваня мобільных телефонів, таблетів ци інчого діґітального ґратя.

Окремы розпоряджыня, але того самого змісту, для каждой з єпархій выдали: архієпископ Євген Попович Митрополита Перемышльско-Варшавскій, єпископ Аркадий Трохановскій,
Владыка Ольштыньско-Ґданьскій та єпископ Бладимір Ющак, Владыка Вроцлавско-Кошаліньскій.

«Певно, што телефон єст підручный, што веце, єст выдавництво, котре до мобільной версиі достосувало цілый обряд богослужыня. Священник не мусит робити закладок, перекладок, не треба перевертати стран – в телефоні вшытко є запоряд записане, як летит. З телефону мож служыти цілу літургію» – повіл в бесіді з Польском Пресовом Аґенцийом єпископ др Аркадий Трохановскій.

До версиі на телефон і таблет доступный є тіж Часослов. «О кілько в примірі нормального Часослова в книжковій версиі треба праві же інструкцию обслугы, што, коли треба выгварити, о тілько тота діґітальна версия має вшытко уложене по черзі» – додал єпарха.

Священникы і діаконы охочо хоснували діґітальны версиі, ци то кєд іде о літурґічны книгы, ци Часослов, але трафляло ся, што робили тзв. selfie. «То пішло уж за далеко. Зато сме рішыли, же справу треба уреґулювати, каждый з єпископів нашой Церкви выдал такій декрет» – повіл владыка Трохановскій.

Владыка признал, што особисто старало го, же священникам вчас богослужыня могли на екрані высвітляти ся не лем літруґічны тексты, але і вшелеякы інчы повідомліня. «Богослужыня є од молитвы» – повіл. «Хоснуваня літурґічных книг вчас богослужынь є о вельо достойнійше».

В розпоряджынях чытаме, што «катеґоричні боронит ся священникам і діаконам хоснувати діґітальне ґратя до робліня знимок і відео вчас Божественной Літургіі», заказ не тыкат вызначеной особы – пресовых представників. Што веце: «вчас уділюваня Таінства Покаяня вшыткы діґітальны акцесориі (…) священник зобовязаный єст лишыти поза сповідальницьом». В бесіді з ППА єпископ Трохановскій признал, што не підозриват, жебы вчас сповіди дахто нагрывал сповід, але аж і вытышеный телефон вібрує, бренчыт – нарушат комфорт і інтимніст сповіди.

О кілько заказ тыкат священників і діаконів, о тілько не тыкат він вірных, кєд хоснуют телефон ци таблет до чытаня діґіатльных версий молитв ци пісен.

Ціле розпоряджыня доступне є за тым мотузком.