Сумар дня на 4. марця 2024 р.

Приносиме вам сумар медияльной ґрупы ЛЕМ.фм+ на ден 4. марця 2024 р.

Концер з граничныма контролями зо Словацийом

Міністер внутрішніх справ і адміністрациі Марцін Кєрвіньскій піднял рішыня о завершыню тымчасового приверніня граничной контролі на граници Польщы зо Словацийом. Граничны контролі перестали там обовязувати од вчера. Остал моніторінґ руху. Подля міністерства, рішыня о завершыню тымчасовой граничной контролі была спричынена «устабілизуваньом ся міґрацийной ситуациі на тзв. Балканьскым шляку і зникніньом загорожыня нелеґальном міґрацийом на польско-словацкым одтинку державной границі». Як дальше подало МВСіА, «в рамках трансграничной спілпрацы міґрацийна ситуация буде фурт моніторувана і в припадку збільшыня загорожыня контрольны діяня на граници можут быти привернены». Окрем того Гранична Страж «дальше буде вела контролі внутрі державы направлены на борбу з нелеґальном міґрацийом на головных комунікацийных шляках і в інчых вытипуваных місцях».

«Русиньска істория і русиньскій язык в теперишнім світі»

3. марця Русины святкуют Ден Русинів Румуніі. Як раз в днях од 29. лютого/фебруара до 3. марця тр. в Переґу Маре в Румуніі проходила конференция пн. «Русиньска істория і русиньскій язык в теперишнім світі», орґазнізувана Світовом Радом Русинів. Конференция прошла в Культурным Центрі Русинів «Александер Духнович» в Переґу Маре. Одбыло ся там і засіданя Світовой Рады Русинів. На конференциі выступили м.ін. др Валерий Падяк з выкладом про біоґрафію Євгенія Фенцика, др Михайло Фейса, котрый бесідувал про конфесийональны школы в Бачці, др Михаіл Капраль з выкладом на тему звань русиньскых поселінь по русиньскы і проблемы орфоґрафічной нормы. Інчы выклады тыкали тіж конкретно Русинів і русиньского языка в Румуніі, Русинів з Марамороша, ци тіж істориі Русинів в самым Переґу Маре.

Carpatho-Ruthenorum 2024

Як подал Інститут Русиньского Языка і Культуры Пряшівского Університету 9. чевця/юнія выстартує 12. річник Медженародной Літньой Школы Русиньского Языка і Культуры Studium Carpatho-Ruthenorum 2024. Тогорічна школа потырват до 29. червця/юнія. В рамках школы будут ведены курсы істориі Карпатскых Русинів, русиньского языка, етноґрафіі та лекциі о русиньскій літературі. Окрем того заплянуваный є і супроводный проґрам, а в його рамках прогулькы до реґіонів, де жыют Русины. Лекциі ведены сут в русиньскым і анґлицкым языках і берут в них участ ученикы з ріжных держав. Інститут Русиньского Языка і Культуры Пряшівского Університету реализує проґрам од 2009 рока. Є то єдина того рода школа на світі.

Заперли міст в Смільнику

Ґміна Команча інформує о часовым запертю мостів в місцевости Смільник. В звязку з реализацийом задачы пн. «Модернізация дороговой інфраструктуры разом з перебудовом мостів на терені Ґміны Команча» мостовый обєкт на потоку Смільничок і на ріці Ослава на трасі ґмінной дорогы нр 117308R в місцевости Смільник буде часово запертый згідно з Проєктом Тымчасовой Орґанізациі Руху од днес, 4. марця од 8.00 год. рано. Плянуваный термін завершыня робіт то серпен/авґуст тр.

Продолжена тымчасова орґанізация руху на улици Домбровского в Польковицях

Ґміна Польковиці інформує, што до 18. марця была продолжена тымчасова орґанізация руху на улици Домбровского. Причыном сут роботы при модернізациі руропроводу, ведены для KGHM. Рух буде проходил наперемінно, а при векшым руху выконавця запевнит ручне стеруваня рухом для поправы плынности переізду. Од. 18 марця або скорше, залежно од погоды, аналоґічно, вылучена з руху буде друга сторона дорогы.