Сумар дня на 14. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 14. лютого/фебруара 2024 р.

Не буде «Бесіды»?

Перша «Бесіда» на 2024 рік уж доступна, але, на жаль, выключні онляйново. Як заявило в офіцийным комунікаті Стоваришыня Лемків – орґанізация не отримала на тот рік дотациі Міністра Внутрішніх Справ і Адміністрация на выдаваня часопису «Бесіда». Дотепер не знатя, чом МВСіА одмовило фінансувати тот лемківскій часопис – выдаваный неперерывно од 35. років, од початку основаня Стоваришыня Лемків – першой повыселенчой лемківской орґанізациі в Польщы. Головный Заряд СЛ звернул ся з писмом до Міністерства з просьбом о зміну рішыня і признаня фінансуваня на печатаня «Бесіды» в 2024 році. Дотля не отримали ниякой одповіди. Окрем одмовы признаня дотациі на часопис, МВСіА не признало фінансуваня інчых основных для нашой соспільности проєктів, м.ін. тогорічного Медженародного Бієнале Лемківской/Русиньской Культуры в Креници ци діяльности Лемківского Ансамблю Пісні і Танця «Ластівочка» в Пшемкові. Як чытаме з комунікаті СЛ: «З надійом на будуче, шефредактор часопису Петро Трохановскій вєдно з Головным Зарядом СЛ рішыли зрыхтувати і выдати лем в електронній версиі першый номер ´Бесіды´ за рік 2024». Примірник мож придбати в інтернетовым склепі Стоваришыня Лемків.

Гіґієна і охорона здоровля на Лемковні

Уж під конец наступного тыжня Руска Бурса в Ґорлицях просит на першый з сериі штырьох тогорічных науковых выкладів, якы пройдут протягом рока в сідибі орґанізациі. Перша прелекция тыкала буде гіґієнічных і здравотных квестий на Лемковні. Выклад пн. «Санітарна ситуация і публичне здоровля в ґорлицкым повіті в ХІХ і в першій половині ХХ столітя» выголосит Даміан Новак з Музею Бічской Землі. Квестиі звязаны з санітарном ситуацийом ци шыроко понятыма квестиями охороны здоровля – особливо тыма, што тыкают публичного здоровля – становлят важну простір в істориі каждого реґіону ци місцевости. Хоц тема є обшырна то вказана буде в спосіб stricte локальный – на примірах выбраных місцевости, як на приклад Новиця ци Радоцина. Прелеґент буде бесідувал о проблемах в доступі до здравотной опікы – шпыталів, дохторів, акушерок, але тіж зреферує темы звязаны зо студнями, цмотнерями, обзерачами трупів, трупярнями ци омовит темы тыкаючы ветеринарийной опікы над худобом. Выклад одбуде ся в пятницю 23. лютого/фебруара о 18.00 год. в Рускій Бурсі, буде тіж трансмітуваный через фанпейдж Стоваришыня Руска Бурса в Ґорлицях на сайті Facebook.

В Гуменным буде новый культурно-соспільный центер

Пряшівскы крайскы посланці рішыли на засіданю в понедільок 12. лютого/фебруара, што місто Гуменне достане дотацию на выбудуваня культурно-соспільного центра з назвом Kultúrna trojbodka в рамках проєкту Місто Культуры 2024. Центр буде побудуваный коло центра вільного часу і Выгорлятской Бібліотекы. Новый будинок буде служыл реализуваню гын культурных подій, презентациі артистів, але тіж на неформальну освіту і активности свобідного часу. Поміч зо страны Пряшіского Самосправного Краю вынесе 25 тис. евро, решту забезпечыт місто Гуменне.

Ремонт дорогы і зміна руху

Од 12. лютого/фебруара до 4. марця введена была тымчасова орґанізация руху при улици Домбровского в Польковицях. Причыном сут роботы при модернізациі водопроводу ведены для KGHM. «Рух проходит на зміну, вчас великого насиліня выконавця має забезпечыти ручне стеруваня рухом для поправы плынности переізду» – бесідує Томаш Матияс, старшый інспектор до дороговых справ в уряді ґміны. Окрем того од 4. марця, або скорше, до кінця марця – аналоґічні – буде вылучена друга страна дорогы.