Сумар дня на 12. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 12. лютого/фебруара 2024 р.

«Лем Бог Cвятый знає, як cя Лемко мaє – в кругу лемківской аксийосферы»

В найблизшу середу 14. лютого/фебруара одбуде ся одкрыта наукова стріча Закладу Языкознавства Інституту Славістикы Польской Академіі Наук. Выступит на ній др габ. Малґожата Місяк, проф. Вроцлавского Університету, котра выголосит выклад пн. «Лем Бог Cвятый знає, як cя Лемко мaє – в кругу лемківской аксийосферы». Стріча в онляйновій формі пройде в годинах од 12.00 до 13.30 на плятформі ZOOM. Для осіб споза Інституту Славістикы Польской Академіі Наук, котры хотят взяти участ в стрічы, мотузок до подіі єст доступный за посередництвом секретарияту: sekretariat@ispan.edu.pl.

«Малопольскій білет на фериі»

Днес офіцияльно зачали ся зимовы фериі в малопольскым воєвідстві, хоц по правді ученикы мали вільне од школы уж од того вікенду. В звязку з тым в суботу 10. лютого/фебруара рушыла специяльна оферта для діти і молодежы пн. «Малопольскій білет на фериі», то значыт білет за злотівку. Білет придбаный в рамках той оферты буде важный цілый ден до пілночы і дозволит на вельократны переізды в рамках сіти получынь Малопольского Воєвідства. Як подал маршалок Вітольд Козловскій, білет за злотівку створили з думком о вшыткых дітях – наймолодшых жытелях реґіону, але і молодых туристах одвиджаючых Малопольщу. Цілю Самоуряду Воєвідства было заохотити подорожуючых до хоснуваня желізничного транспорту і розпропаґувати желізницю як еколоґічный середок транспорту серед діти і молодежы. З оферты будут мочы скорыстати діти од 4. рока жытя до початку прирыхтуваня передшкільного, як і діти і молодіж од початку прирыхтуваня передшкільного до завершыня понадосновной школы на основі леґітимациі. Оплата за білет вынесе злотівку незалежно од долгости трасы. Білеты будут узнаваны в потягях Малопоьскых Желізниц, POLREGIO і особовых потягах «Шлезскых Желізниц» на одтинку Катовиці-Краків і Катовиці-Закопане. Окрем того будут позваляти на переізды автобусами Малопольскых Довозовых Леній. Акция потырват до 25. лютого/фебруара тр.

Соспільны консультациі в Польковицях

Бургомайстер Польковиц просит на соспільны консультациі. Будут они тыкати концепциі одкрытя Центра Молодіжной Активности. Соспільны консультациі позволят властям познати опінію жытелів на тему створіня місця приязного молодежы. Як подал віцебургомайстер Польковиц Кшыштоф Нестер, підчас стрічы спільно створят концепцию фунґуваня Центра Молодіжной Активности, жебы в будучности был альтернативом безпечного проводжыня часу для молодых Польковичан. Перебудова локалю при ул. Ґлоґівскій з перезначыньом на середовискову світлицю была поділена на дві зоны. Перша дає условія до стріч і бесід, а друга позвалят на обзераня фільмів і забаву. Заплянувано і поміщыня получене з ідальньом і кухньом, де участникы світлиці будут мочы разом варити. На соспільных консультациях буде запрезентувана візуализация обєкту і функцийональный проґрам поєдных поміщынь. Подля плянів простір має запевнити каждому молодому чловекови одповідні условія до рыхтуваня домашніх задач і розвиваня своіх пасий подля індивідуальных потреб. Окрем того запевнена буде поміч психолоґа. Стріча пройде в найблизшый четвер 15. лютого/фебруара о 17.00 год. в просторах Учельні Яна Выжыковского в Польковицях.