Сумар дня на 9. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 9. лютого/фебруара 2024 р.

Конец дискримінациі німецкой меншыны

В тым тыжни опубликуване было розпоряджыня Міністра Едукациі з 2. лютого/фебруара тр., котре кінчыт з 1. вересня/септембра тр. дискриминацию німецкой меншыны в сфері освіты. Змінят оно розпоряджыня в справі условій і способу выконуваня предшколями, школами і публичныма пляцівками задач, позваляючых на підтримуваня почутя нацийональной, етнічой і языковой достоменности учеників належачых до нацийональных і етнічных меншын та соспільности хоснуючой реґіональный язык. Подля введеной зміны додаткове вчыня языка меншыны або реґіонального языка як материньского буде од 1. вересня/септембра проходило в вымірі 3 годин на тыжден. Припомнийме, што в лютым/фебруарі 2022 р. бывшый Міністер Едукациі і Наукы Пшемыслав Чарнек выдал дискримінуюче розпоряджыня, котре ограничыло од 1. вересня/септембра 2022 р. тыжньове чысло годин вчыня меншынового німецкого языка з трьох годин до єдной.

Засіданя Соймовой Комісиі до справ нацийональных і етнічных меншын

Як подал Центр Заанґажуваных Досліджынь над Культуровым Спадкобраньом на Выділі «Artes Liberales» Варшавского Університету, вчера одбыло ся засіданя Соймовой Комісиі до справ нацийональных і етнічных меншын, котра приняла м.ін. інформацию МВСіА в справі рапорту з реализациі постанов Карты Реґіональных і Меншыновых Языків. Як оцінила проф. Юстина Олько, директорка Центру «в інтересі державы лежыт, жебы меншыновых і реґіональных языків вчыло ся як найвеце осіб, тіж неідентифікуючых ся з меншынами. Єст то необхідне для створіня берже приязного середовиска і обставин для фунґуваня меншын, для ревітализациі локальных форм вельоязычности, котры все были натуральном приметом соспільности, і для векшой соспільной спійности». Віцемістер едукациі Катажына Любнауер подала і інформацию, што Міністерство Едукациі кінчыт ганебну дискримінацию діти німецкой меншыны во вчыню іх материньского языка. Окрем того експерт в обшыри меншыновых языків професор Університету Адама Міцкєвича в Познані Томаш Віхеркєвич запропонувал взяти під увагу зорґанізуваня в соймі конференциі, якя мала бы ся зосереджати на вшыткых меншыновых языках в Польщы. Підчас стрічы спомнено і на права абсольвентів і студентів кашебской етнофільолоґіі на Ґданьскым Університеті, котры як результат дискримінуючого розпоряджыня міністра Чарнка з вересня/септембра минулого рока стратили право до выконуваня працы учытеля кашебского языка.

Чемпіонат Польщы MTB XCO в Креници

В Креници на Парковій Горі пройдут 1. червця/юнія тр. змагяня біциґлів Чемпіонат Польщы MTB XCO. Як подал бургомайстер Крениці Пьотр Рыба, Світова Біциґльова Федерация признала змагяням высшу як передвиджено катеґорию C1, што збільшат можливе до здобытя чысло пунктів в ґенеральній клясифікациі. Высша ранґа змагань має притягнути іщы векше чысло участників.

Успіхы польковицкой лікарні

Польковискій Центр Здравотных Услуг тішыт ся в остатнім часі великыма успіхами. Лікарня отримала м.ін. выріжніня в конкурсі «Успіх Рока в Охороні Здоровля – Лідеры медицины 2023» в катеґориі Лідер Рока 2023 в Охороні Здоровля. Окрем того Центр занял перше місце в плебісциті «Гіпократес», як і отримал званя «Лідер Державы» в нацийональным ранкінґу оціны підприємств в Польщы на основі фінансово-економічных показників.