Сумар дня на 7. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 7. лютого/фебруара 2024 р.

Нагородили пароха з Бортного

В понедільок 5. лютого/фебруара в Маґурскій Таверні прошла Новорічна Стріча Ґміны Санкова. Цілю стрічы было підсумувати минулый рік. Запрошены были жытелі ґміны і гості з сусідніх ґмін. Участниками были м.ін. староста ґорлицкого повіту Мария Ґубала, представникы рады повіту ци рад сусідніх ґмін. Війт Ґміны Санкова Малґожата Малух подякувала вшыткым, котры підперают Ґміну Санкова в діянях для єй розвитку, запрезентувала тіж зреализуваны інвесетициі і подіі, якы прошли на обшыри ґміны минулого рока. На стрічы вручено тіж нагороды Ґміны Санкова для найбарже залсуженых осіб для локальной соспільности. Выріжніня переданы были в пятьох катеґориях: туристика, культура, спорт, підприємця і соспільны діяня. Серед нагородженых нашол ся м.ін. о. прот. Мирослав Цідило, парох парохіі свв. Космы і Даміана в Бортным.

Лемківскій для каждого!

Лемківского языка мож ся буде вчыти на Ягайлоньскым Університеті – поінформувала о тым др габ. Олена Дуць-Файфер, выкладовчыня і знавчыня з обшыри лемківского языка. Уж о хвилю на найстаршым польскым університеті выстартує лекторат з лемківского языка, якій буде нагодом для вшыткых, што хотят ближе познати тот східньославяньскій язык. Лекторат лемківского языка веденый буде в Інституті Східньославяньской Філолоґіі ЯУ проф. Оленом Дуць-Файфер, яка в своій долголітній науковій працы вельо місця посвячат як раз основам вчыня лемківского языка, ци тіж досконаліню його знаня. Занятя сут для каждого – незалежно од того, ци даколи мал справу з лемківском бесідом і писаным лемківскым словом. Предовшыткым занятя направлены сут для студентів, докторантів і науковых робітників ЯУ. Але не є то перешкода, жебы в лектораті взали участ інчы особы – адже і тоты нияк незвязаны з краківскым університетом. Лекторат реализуваный буде три семестры (3 х 60 год.). Занятя зачнут ся в ближучым літнім семестрі академіцкого рока. Хто охочый – мож ся записати через студентскій секретарият: dorota.krakowska@uj.edu.pl.

Конференция Европа Карпат

3. і 4. лютого/фебруара на замку в Красічыні прошла 37. медженародна конференция Европа Карпат. Є то ініциятива спілпрацы і діалоґу держав, на териториі котрых находят ся Карпаты та сусідніх до них держав. В подіі взяли уаст самоурядовці, парляментаристы і науковці, м.ін. з Польщы, Словациі, Чех, Мадяр і Литвы. Єдном з головных тем была бесіда о наслідствах войны в Украіні. В Красічыні бесідували тіж о обнятю через Польщу президенциі в Раді Европейскій Уніі в 2025 році. Підкрисляно, же буде то нагода, жебы звернути увагу на проблеми держав Серединной Европы. Окрем того Польща од 1. липця/юлия обойме лідеруваня Ґрупі Вышеградскій V4. Вчас засіданя Европы Карпат бесідувано тіж про проєкт Карпатска Стратеґія та про реґіональну політику територияльных самоурядів, што фунґуют на обшыри Карпат. Карпатска Стратеґія то вшыткы діяня, ініциятивы, інвестициі, котры вєдно трактуваны сут як діяня для Карпат – то макрореґіональна стратеґія. Участникы конференциі підкрисляли, што Карпаты мают великій потенциял, котрый не єст іщы до кінця схоснуваный.

Польковичанкы черговый раз з Чемпіонатом Польщы!

Третій раз запоряд кошыкаркы KGHM BC Польковиці здобыли Чемпіонат Польщы. В фіналі выграли з актуальным Мастером Польщы – з ґрупом з Люблина – Polski Cukier AZS UMCS Lublin. Польковичанкы авансували до фіналу, коли скорше выграли з екіпом з Ґожова. В фіналі Польковичанкы з перевагом выграли першу кварту, в другій ліпшы были Люблинянкы і до перервы был реміс. В другій части мечу Польковичанкы скоро одскочыли противній команді і контролювали гру до кінця – тым самым третій раз запоряд здобыли Чемпіонат Польщы. Додатково MVP змагань была кошыкарка Польковиц – Stephanie Mavunga.