Сумар дня на 2. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 2. лютого/фебруара 2024 р.

Продолжена контроля на граници зо Словацийом

Тымчасова гранична контроля на граници зо Словацийом продолжена до 2. марця тр. Міністерство Внутрішніх Справ і Адміністрациі пояснят рішыня дальшым серіозным загорожыньом – нелеґальном міґрацийом на тым одтинку державной ґраниці. Контролі сут ведены лем на візд зо Словациі до Польщы і не зосереджают ся на туристичным руху. Подорожны мусят єднак памятати мати при собі документы подорожы – особистый довід або пашпорт. Тымчасова контроля на граници зо Словацийом тырват уж од 3. жолтня/октобра 2023 р. На початку мала потырвати лем 10 дни, але од тамтого часту фурт єст продолжана – тепер уж шестый раз.

Лемківска літературознавчыня – Марта Ватраль

Інформуєме, што до шору лемківскых дослідників зо ступеньом доктора долучыла Марта Ватраль. Дослідничка перед двома місяцями, 1. грудня/децембра 2023 р., успішні оборонила на Ягайлоньскым Університеті докторску дисертацию пн. «Парадиґмы будительства в лемківскій літературі. Конструкты, реализациі, перспективы», котрой промоторком была проф. Олена Дуць-Файфер. Головном цілю працы было омовити механізмы формуваня ся канону лемківской літературы і фіґур єй найважнійшых творців, што проанализуваны были подля авторской катеґориі будительскых парадиґм. Бадачка выріжнила і омовила трьох найважнійшых для темы авторів: Александра Духновича, Владиміра Хыляка та Петра Трохановского. Aнализувала, м.ін. як іх творчіст влияла і влият на лемківску ідентичніст. Марті Батраль залежало, жебы вказати, як літературны тексты влияют на формуваня ся етнічной достоменности, особливо в примірі меншыны. Більше на тему працы прочытате в дописі на нашым портали. Рада Дисципліны Літературознавство на Ягайлоньскым Універститеті на засіданю 20. грудня/децембра 2023 р. приняла внесок Комісиі о наданя мґр Марті Ватраль наукового ступеня доктора в обшыри гуманістичных наук в дисциплині літературознавство. Ґратулюєме!

Нове освітліня на дорозі до креницкой ґондолі

Бургомайстер Крениці поінформувал, што реализуют чергову інвестицийну задачу – будову уличного освітліня на дорозі ведучой до креницкой ґондольовой желізниці од Готелю Чорный Потік. В минулым році повело ся замонтувати першы три лампы, а в тым році інвестиция має быти продолжана в дакількох етапах і завершена.

Сеґреґация одпадів або высшы оплаты

Ґміна Польковиці припоминат о конечности правильной сеґреґациі комунальных одпадів. То не лем проблем рециклінґу, але і штомісячной оплаты за смітя. Як подала підінспектор до справ еколоґічной едукациі в Звязку Ґмін Мідьового Басену Маґда Сітницка, в остатнім часі Польковицка Долина Рециклінґу, фірма одбераюча одпады, звертат увагу на присутніст ґрузу і інчых поремонтовых одпадів в поємниках до сеґреґациі. Одобраня чыстых фракций суровцьовых одпадів позвалят на іх одзысканя в процесах рециклінґу. Додатково пристутніст ґрузу в одпадах збераных селективно може довести до знищыня машын і нарядя сортовничых леній, котрых направы вяжут ся з великыма коштами. Влият то на кошты утилизациі одпадів, а што за тым іде штомісячну оплату за смітя. В припадку вельолокаторовых нерухомости санкциі сут накладаны на вшыткых жытелів спільноты. Ґміна припоминат, што в Польковицях будовляных і інчых проблемовых одпадів мож ся позбыти в Пункті Селективного Збераня Комунальных Одпадів при ул. Дзялковій 18.