Братіславска архідієцеза фінанчно помогла Пряшівскій архієпархії по землетрясіню

Як інформує Пресова канцеларія Конференції єпіскопів Словакії (TK KBS), в рамках традічной Святомартіньской добродительской збіркы, котра шторік орґанізує ся з нагоды покровителя Братіславской архідієцезы, вызберало ся у 2023-ім році рекордных 185 518 евр.

За словамми братіславского римокатолицького архієпіскопа митрополіты Станіслава Зволеньского, архідієцеза вырішыла підпорити з тых грошей тых, котрых постигло в минувшім році землетрясіня на выходній Словакії.

Фінанції Братіславска архідієцеза розділила точно на половину, з чого єдна іде про Кошыцьку римокатолицьку архідієцезу, друга про Пряшівску ґрекокатолицьку архієпархію. Грошы підуть передовшыткым на оправы римокатолицькых і ґрекокатолицькых храмів у селах Янковці, Нижня Сітніця, Корункова, Сопківці і Пакостів.

Несподіваня про нового митрополіту

Братіславскый архієпіскоп митрополіта передав фінанчну поміч по землетрясіню сімболічнов грамотов кошыцькому архієпіскопови митрополітови Бернардови Боберови, і пряшівскому архієпіскопови митрополітови Йонови Максимови.

„В суботу по торжестві в Пряшові мі архієпіскоп Станіслав Зволеньскый приготовив миле несподіваня, кедь ня покликав до другой містности і передав мі грамоту, на котрій была сума з їх Святомартіньской збіркы,“ повів Высокопреосвященый Йона про TK KBS.

Пряшівскый архієпіскоп митрополіта так само припомянув слова з Біблії: „Радуйте ся з тыма, што ся радують, а плачте з тыма, што плачуть.“

„Я особно барз радый, же духовенство і віруючі Братіславской архідієцезы зрозуміли тото слово і повірили йому. В рамках Святомартіньской збіркы вызберали чудесну суму на поміч нашым парохіям і храмам, котры постигло землетрясіня,“ повів владыка з тым, же многы люди стратили стріху над головов і в їх обыстях не мож жыти.

„Вдяка тым вашым дарам будуть мочі оправити ся найвеце пошкоджены храмы, а не зістане бремено лем на плечах тых, котры самы пришли о обыстя,“ повів владыка Йона.

Землетрясіня із октобра

На выході Словакії было землетрясіня 9-го октобра 2023-го року з маґнітудов 4,9 і епіцентром в катастрі села Дяпалівці. Запричінило матеріалны шкоды головно на родинных домах в дакілько селах в окресах Гуменне і Воронів над Топльов, но пошкоджены были і храмы.

В епіцентрі было чути іщі 32 далшых дозвуків землетрясіня аж до 7-го януара того року, што запричінило далшы шкоды на будовах.

Братіславска архідієцеза робить Святомартіньску добродительску збірку каждый рік, причім перша орґанізовала ся у 2009-ім році.