Сумар дня на 26. січня/януара 2024 р.

Приносиме вам сумар медияльной ґрупы ЛЕМ.фм+ на ден 26. січня/януара 2024 р.

Перегляд Колядничых Ґруп в Рускій Бурсі

Вчера, 25. січня/януара, одбыл ся черговый Перегляд Колядничых Ґруп в Рускій Бурсі в Ґорлицях. Бурсяне колядуваня, так як в попередніх едициях, было направлене не лем на діти, учеників, іх учытелів і родичів, але предовшыткым любителів лемківской культуры. Выступили діти – ученикы лемківского языка з з Бодаків, Высовоы, Ганчовы, Брунар, Баниці, Ґладышова, Устя, Снітниці і Розділя. Выступуючы ґрупы зрыхтували учытелькы Анна Рыдзанич, Орина Гутиряк (враз з імостю Марийом Цідило) і Варвара Дуць. Колядничу ґрупу з Розділя зрыхтувал о. Григорий Пацан. На новым фейсбуковым сайті Стоваришыня «Руска Бурса» в Ґорлицях зробили сме про вас перенос нажыво. Награня з перегляду фурт можете найти на фейсбуковым сайті Руской Бурсы, як і удоступнене на нашым радийовым профіли.

«синьов країнов»

На осін миулого рока накладом Стоваришыня «Руска Бурса» в Ґорлицях вказала ся публикация пн. «синьов країнов», авторства Петра Медідя, нашого радийового камарата, котрый дал ся уж нам познати як соспільный активіста, новинар, журналиста, коментатор, автор публицистичных текстів, перекладач, драматурґ, а тіж актор і вокалиста. «синьов країнов» то дебютанстска збірка поезиі Петра Медвідя. Автор од років приходил зо свойом творчістю хоц-бы на Лемківскы Творчы Осени, але тепер вершы были упорядкуваны і надана была ім, не так часто стрічана, форма квадратовой публикациі. В дописі на нашым портали можете прочытати бесіду з проф. Оленом Дуць Файфер, яка попри вшыткых своіх чысленных функциях є і поетком, в котрій анализує і рецензує творчіст Медвідя. Найдете там і мотузок до нашого інтернетового склепу, одкале мож придбати публикацию.

Проґрам социяльной помочы для жытелів ґміны Польковиці

Полнолітні жытелі ґміны Польковиці, котры мают трудности в самодільным переміщаньом ся, з огляду на хвороту або неполносправніст, можут хоснувати безплатный транспорт, жебы залатвити своі індивідуальны справы. То в рамках проґраму бургомайстра Польковиц Лукаша Пузнєцкого пн. «Проґрам социяльной помочы в обшыри злeгшыня доступу до здравотных і адміністрацийно-правных услуг жытельам ґміны Польковиці». Як подал віцебургомайстер Польковиц Кжыштоф Нестер, забезпечыли середкы, жебы особам, котры потрібуют достати ся до медичных єдиниц або залатвити адміністрацийны справы, а мают проблемы з порушаньом ся, уможливити доізд до выбраных місц, в одлеглости не веце як 350 км в єдну сторону. Кєд потрібуют они помочы дакого з родины або опікуна, в тым пса провідника, то іх тіж обнимат проґрам. Реализацийом проґраму занимат ся Осередок Социяльной Помочы в Польковицях. Проґрам потырват до кінця рока.

Модернізация ґлоґівской бібліотекы

Містна Публична Бібліотека в Ґлоґові буде змодернізувана. Плянуваный кошт інвестициі то близко 3 мілийоны злотых. Завдякы дотациі в рамках Нацийонального Проґраму Розвитку Чытальництва, в квоті 2,25 млн злотых, проєкт стал ся можливый до реализациі. Перебудова бібліотекы обнимат вбудуваня вінды в будинку, выміну віконной столяркы, інсталяцию нового пеца разом з інсталяцийом центрального огріваня, выміну електричной та водно-канализацийной інсталяциі, выміну сходовой кліткы і аранжацию інтерєру.