Сумар дня на 24. січня/януара 2024 р.

Приносиме вам сумар медияльной ґрупы ЛЕМ.фм+ на ден 24. січня/януара 2024 р.

Буде Вас бракувало на Ватрі…

З жальом інформуєме, што 22. січня/януара 2024 рока одышол до вічности Ярослав Шляхтич – староста Лемківской Ватры на Чужыні. Бл. п. Ярослав Шляхтич был заслуженым членом Стоваришыня Лемків (приналежал до михалівского Кружка СЛ). Долгы рокы анґажувал ся в поміч при орґанізациі Лемківской Ватры на Чужыні, а згідно з принятом традицийом, як найстаршый лемківскій жытель Михалова (а при тым і уродженец Лемковины) од 2017 рока мал чест класти оген розпаляючый михалівску Лемківску Ватру. Остатню Лемківіску Ватру на Чужыні розпалил в минулым році. Покійный вродил ся 15. мая 1933 рока во Фльоринці, як сын Тевдора і Анны. В 1947 році, як каждый Лемко, был насильно і беззаконно выселеный з рідной землі і привезеный до села Михалів на понімецкым Нижнім Шлеску. Парастас пройде в пятницю в михалівскій церкви о 18.00 год, а похоронны богослужыня зачнут ся в суботу о 11.00 год. Вічна Йому Памят!

Русины на стрічы в президенткы Зузаны Чапутовой

Вчера в Словацкій Республиці прошла традицийна новорічна стріча президенткы Зузаны Чапутовой з представниками громадяньской соспільности. Участ в стрічы взяли представникы веце як 50. позаурядовых орґанізаций з ріжных обшыри жытя. Запрошный до участи был і председа Округлого Стола Русинів Словациі Петро Штефаняк. Подля слів Штефаняка, вчас стрічы президентка заінтересувана была роботом орґанізаций та перспективом інчых здружынь. Председа ОСРС передал поздоровліня од Русинів та в бесіді з президентком підркислил, што активности президенткы прямены до Русинів вчас Дня Русинів Словациі барз позитивно резонували в соспільности. Припомнийме, што в патріотичне свято русиньской меншыны Чапутова одвиділа Русинів в Братиславі і як все звернула ся з офіцийныма желанями з нагоды свята. На вчерашній стрічы президентка повіла, што громадяньска соспільніст часто дополнює ролю державы і позаурядовы орґанізациі сут потрібны в каждій демокрациі.

Колиба в Бортным зас принимат вандрівників

По парох місяцях непевности туристична колиба в Бортным є зас одкрыта для туристів. Деревяна колиба находти ся выже послідніх лемкіскых хыж в селі. Од минулого рока обєкт был запертый і стоял порожній. Новым арендярьом остала Ева Бєль. Ґарантує, што каждый індивідуальный туриста найде гын схороніня без скоршой резервациі, а в плянах є орґанізувати на місци концерты і варштаты. В колибі мож уж наняти спаня од парох тыжнів, але кухня фурт є ремонтувана. По отриманю дозволінь будут пропонувати реґіональны стравы. Колиба буде отворена цілу добу. Обєкт з Борного єст єдным з 10 збудуваных в 70. років минулого столітя подля концепциі Едварда Москалы – в заміріню мала то быти альтернатива для популярных і масовых колиб, в котрых без резервациі каждый вандрівник міг ся переспати. Подібна колиба, хоц тепер закрыта уж пару років, діяла на Маластівскій Маґурі.

В Польковицях неє нуды

Близко 240 діти возме в сумі участ в зимовых пілтаборах для учеників ґмінных шкіл Ґміны Польковиці, котры тырвают вчас зимовой перервы од школы. Для нижньошлезского воєвідства перерва в реґулярых шкільных занятях проходит од 15. до 28. січня/януара. Занятя тырвают од 8. до 15. годины, проходят головні в Основній Школі но 1. В проґрамі окрем напр. плястичных ци музичных ватштатів сут прогулькы, выходы на ледовиско, запрашаны сут тіж специяльны гості, якы вчас бесіды заохочуют діти напр. до фізичной активности. Зимовы пілтаборы закінчыт показ талянтів.

Фот. www.facebook.com/schronisko.bartne