На стрічі словацькой презіденткы з гражданьсков сполочностьов участный і председа ОСРС

Кріпку гражданьску сполочность із фунґуючіма мімовладныма орґанізаціями потребує кажда демокрація, включно той словацькой.

Презідентка Словацькой републікы Зузана Чапутова то повіла у віторок 23-го януара 2024-го року в рамках свого приговору почас традічного новорічного приятя представителів гражданьской сполочности. Участь на стрічі з презідентков брали представителі понад 50-ох мімовладных орґанізацій з різных областей общественного жывота.

Запроченый на стрічу, котра проходила в Презідентьскім палаці, быв і председа Округлого стола Русинів Словакії Петро Штефаняк.

„Презідентка тым способом хотіла оцінити роботу орґанізацій і ближе спознати перспектівы окремых здружінь,“ повів председа ОСРС, котрый з ньов мав і куртый особный розговор. Особно презідентці передав поздоровліня од Русинів, і подяковав голові державы за людьскый приступ і інтерес о діяня в народностных меншынах.

Штефаняк окремо підкреслив актівности прямены до Русинів почас Дня Русинів Словакії, котры резоновали в сполочности з барз позітівныма реакціями.

Припоминаме, же в році 2023 на День Русинів Словакії, котрый святкує ся 12-го юна, презідентка Чапутова навщівила русиньску комуніту в Братіславі. Завітала до просторів, в котрых має свої нацвікы Фолклорный ансамбель Рутенія, як і Дітячій фолклорный колектів Рутенячік. І в далшых попередніх роках все спомянула собі на Русинів почас іх цілодержавного свята.

Словацька презідентка почас стрічі з гражданьсков сполочностьов, значіть мімовладныма орґанізаціями, меджі котры належать і русиньскы орґанізації, повіла, же гражданьска сполочность часто доповнює роль державы, припадно рішыть абсенцію державных рішінь. Мерзить єй, кілько енерґії мусять мімовладны орґанізації присвятити обороні перед політічно мотівованыма атаками.