Вмер Ярослав Шляхтич (1933-2024), Староста Лемківской Ватры на Чужыні

З жальом інформуєме, што 22. січня/януaра 2024 р. вмер Ярослав Шляхтич, Староста Лемківской Ватры на Чужыні.

Покійный вродил ся 15. мая 1933 р. во Фльоринці, як сын Тевдора і Анны. В 1947 році, як каждый Лемко, был насильно і беззаконно депортуваный з рідной землі і привезеный до села Михалів, недалеко Любіна, на понімецкым Нижнім Шлеску. Там зачал жытя «од нова», творячы лемківску спільноту села (до Михалова трафили 33 родины з Фльоринкы).

Бл. п. Ярослав Шляхтич был заслуженым членом Стоваришыня Лемків (приналежал до михалівского Кружка СЛ). Долгы рокы анґажувал ся в поміч при орґанізациі Лемківской Ватры на Чужыні.

Згідно з принятом традицийом, як найстаршый лемківскій жытель Михалова (а при тым і уродженец Лемковины), од 2017 рока был Старостом Лемківской Ватры на Чужыні – каждого рока мал чест класти оген розпаляючый михалівску Лемківску Ватру. Остатню Лемківску Ватру на Чужыні розпалил в 2023 році. На тій Ватрі святкувал тіж свій ювілей – 90. річницю народин.

Парастас буде одслуженый в найблизшу пятницю в михалівскій православній церкви св. Михала Архангела. Похорон зачне ся в суботу о 11.00 год., пак Покійный спочне серед своіх сусідів і близкых на цмонтери в Тшебницях.

Вічна Вам Памят!