Сумар дня на 22. січня/януара 2024 р.

Приносиме вам сумар медияльной ґрупы ЛЕМ.фм+ на ден 22. січня/януара 2024 р.

Опінія омбудсмана в справі наукы меншынового німецкого яызка

На інтернетовым сайті Бюлетину Публичной Інформациі была опубликувана опініня омбудсмана для міністер едукациі, в справі наукы німецкого языка як меншынового языка. Подля опініі, приверніня німецкого языка в вымірі обовязуючым до 31. серпня/авґуста 2022 р., і на основі рівности з інчыма меншынами, треба ввести як найскорше, іщы в текучым шкільным році. Як підкрислил омбудсман Марцін Віонцек в писмі до Барбары Новацкой, може то становити орґанізацийне вызваня для шкіл, але з часом социяльны наслідства ограничыня права німецкой меншыны до наукы власного языка будут штораз тяжшы до одверніня. Предовшыткым влият то неґативно на підтриманя культурно-языковой достоменности той меншыны.

Музей Лемківской Культуры взновит діяльніст

На початку того місяця передали сме інформацию, што Музей Лемківской Культуры в Зындрановій фурт остає закрытый, в звязку з браком рішыня в справі міністерияльных цільовых дотаций для нацийональных і етнічных меншын. Тепер Музей поінформувал, што закрытый дла звиджаючых буде в періоді од 1. січня/януара до 3.1 марця тр. Од квітня/апріля Музей Лемківской Культуры взновит свою діяльніст і буде зас одкрытый для звиджаючых. Міністерство Внутрішніх Справ і Адміністрациі признало дотациі на тот рік на діяльніст і утриманя музею, як і шторічне свято «Од Русаль до Яна» та публикацию книжкы «Жытя Лемка».

Ювілейне друкуване выданя Інтерфийсы

Заран, 23. січня/януара минут рівно три рокы, одколи до русиньского світа інтернету вступил вебсайт Інтерфийса. Стоіт за ним двох молодых русиньскых ентузиястів з Підкарпатя – Мигаль Лыжечко і Петро Біров. Од свого выникнутя порталь Інтерфийса приносит статі з обшыри технолоґічных новости, популярной наукы, і є унікатным русиньскым проєктом што до той проблематикы. Як оголосили редакторы, з нагоды третьой річниці основаня сайту рыхтуют про своіх чытачів святочне друкуване выданя, в котрым будут найліпшы статі публикуваны на портали, як і ексклюзивны материялы, котрых іщы на вебсайті не было. Більше про друкуване выданя Інтерфийсы, як і можливіст його придбаня, найдете в дописі на нашым портали.

Мож уж придбати третьу част з сериі «Оповім Ти байку. Байкы Русинів і інчых народів»

Кінцьом 2023 рока стараньом Стоваришыня «Руска Бурса» в Ґорлицях печатана была третя част байок з сериі «Оповім Ти байку. Байкы Русинів і інчых народів». Книжочку зас ілюструвал выдатный маляр – Анджей Жыґадло. «Горошок, бобошок» під редакцийом Варвары Дуць то обовязкова позиция для вшыткых тых, котры мают уж на своіх поличках дві попередні части: «Іде бобо» та «Комар косит». О найновшій части прочытайте на нашым портали. Найдете там тіж мотузок до нашого інтернетового склепу, одкале мож придбати книжочку.

Еколоґічный конкурс в Польковицях

Бургомайстер Польковиц просит жытелів ґміны до участи в науковым конкурсі «Климат в часах Нетфлікса». Проєкт тыкат еколоґіі і охороны середовиска. Його цілю єст шыріня знаня з обшыри охороны середовика, усвідомліня соспільства о загорожынях выникаючых з хоснуваня неодновлювальных джерел енерґіі, змін климату, головно ґлобального отепліня. Участникы мают зробити фільм на проеколоґічну тему, котрый має тырвати од 2 до 3 минут. Зголошыня будут приниманы до кінця лютого/фебруара в канцеляриі уряду ґміны.