«Слово» – Праздник Богоявленія – неділя, 9.00 год.

Пережываме другый великый праздник нашого церьковного рока – Богоявленіє. Што то є за праздник? Говорить о події, коли Ісус пришов на Йордан, жебы дати ся покрестити.

Йоан в тім часі высокыма словами бісідовав о приходячім Спасительови. Ісус приходить покорно а стане ку іншым просячім Йоана о крещіня. Йоан не хоче, а говорить, же він бы ся мав дати покрестити Ісусови. Но тот йому повів: Зохаб так, теперь! Ты не розумиш, чом так роблю. Зохаб высокы бісіды о мі. І тото настане, але у своїм часі.

Коли Йоан Його покрестив, отворило ся йому небо, Святый Дух в подобі голуба зышов на Нього а з неба было чути голос: Тото є мій прелюбый Сын, в котрім я мам залюбліня. Ісус давать ся покретити, жебы нам даровав великый дар – святе Крещіня. Через святе Крещіня сьме были занурены вєдно з Хрістом до смерти старого чоловіка, жебы выходивши з воды, жыти уж новым жывотом.

Настало дашто велике. Уж то не є тот самый чоловік. Быв зачлененый до родины самого Бога. Може ся звати Божов дітинов. То є штось так велике, так вызначне, же Бог бере чоловіка за свою дітину.

Апостол говорить: сьме Божы діти а іщі ся не выявило чім будеме. Но тото приятя за Боже дітинство кладе на нас обовязаня: жебы уж не смотрити долов на гада. Так, як смотрили першы родічі, коли свій погляд одвернули од неба, а смотрили долов. А якы были наслідкы? Смерть. Маме смотрити горі. Отворило ся Йому небо. Отворило ся і нам небо.

Дякуйме за тот великый дар святого Крещіня і за то, же через то сьме ся стали Божыма дітми, належыме до Божой родины. Хрістос раждаєт ся!

В неділю, 21. януара 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 21. януара 2024 р. о 12.00 год. і 22. януара 2024 р. о 2.00 год. за русиньскым часом.