Сумар дня на 19. січня/януара 2024 р.

Приносиме вам сумар медияльной ґрупы ЛЕМ.фм+ на ден 19. січня/януара 2024 р.

Ґжеґож Браун стратил посольскій іммунітет

Польскій Сойм рішыл одобрати іммунітет послови Конфедерациі Ґжеґожови Браунови. Головном причыном был ганебный злочын посла Брауна, котрого допустил ся 13. грудня/децембра минулого рока – згасил девятраменну менору запалену в Соймі з нагоды жыдівского свята Ханука. Перше за одобраньом іммунітету Браунови оповіла ся соймова Реґулямінова Комісия. 9. січня/януара тр. внесок о потягніня посла до карной одповідальности зложыл округовый прокуратор в Варшаві. Во внеску прокуратора нашло ся сім пунктів, голосувань так само было сім. Сойм принял векшыном голосів вшыткы пункты прокураторского выроку, што значыт, же Ґжеґож Браун стратил іммунітет. Припомнийме, што Ґжеґож Браун, 5. грудня/децембра вчас пресовой конференциі в Соймі, хоснуючы етнонімы Карпатскы Русины, Лемкы вказал, што брали нибы то они участ в діянях ОУН-УПА по 1945 р. на шкоду польскых громадян, а тіж хоснувал медияльне госло «Piąty rozbiór Polski», односяче ся до звороту лемківскых лісів. Стоваришыня Руска Бурса в Ґорлицях выстосувало в тій справі писмо до Маршалка Сойму. В одповіди Канцелярия Маршалка Сойму і Сенату подала, што зголошыня тыкаюче ксенофобічного і шовіністичного выступліня посла Брауна взглядом лемківской меншыны было передане до Комісиі Посольской Етикы.

Капеля Древутня нагороджена ”Орлом Впрост” 

Капеля Древутня поінформувала на своім фейсбуковым сайті, што отримали статую ”Орла Впрост” люблиньского воєвідства 2023, в категориі Візитка реґіону. ”Орлы Впрост” то нагороды для фірм, самоурядовців, вызначных особности реґіонів та представників наукы, медицины і соспільных діячів. Оцініня єст для тых, котры вносят особливый вклад в розвиток економіі, реґіону і польской державы. Капеля Древутня єст барз добрі знана лемківскій публиці, велика част єй репертуару то лемківскы пісні. Ґрупа не раз выступувала на лемківскых фестівалях, м.ін. на Лемківскій Ватрі в Михалові. В минулым місяци ансамбль святкувал ювілей 25. років істнуваня.

Наукове засіданя на лемківску тему в Музею Народного Будівництва

В будучым тыжни, в четвер 25. січня/януара о год. 17:00 в Музею Народного Будівництва в Саноку одбуде ся наукове засіданя, на котрым выклад выголосит др Губерт Оссадник. Темом прелекциі буде ”Східня Лемковина в меджевоєнным періоді як специфічне культурне, етнічне і етноґрафічне погранича”. На подію просит Етноґрафічна Комісия Польской Академіі Знань. Участ в стрічы мож взяти заєдно стацийонарно, як і онляйн, через плятформу ZOOM.

Зміны в руху в Польковицях

Ґміна Польковиці поінформувала о зміні в орґанізациі руху на ул. Пшемысловій в Польковицях. З огляду на некорыстны атмосферичны условія зміненый был термін вылучыня з руху одтинка нр 5 на понедільок 22. січня/януара. Тягаровым автам буде удоступненый переізд одтинком 3b по камінным покрытю. Решту кєровців обовязуют обізды. Працы в рамках догваріня обнимают модернізацию близко 2,5 км одтинка ул. Пшемысловой. Дорога буде зміцнена і пошырена, жебы додатково выділити пас роверовой стежкы, кора получыт шахты ”Рудна Головна і ”Рудна Західня”. Інвестиция єст реализувана в рамках проґраму бургомайстра Польковиц Лукаша Пузнєцкого, тыкаючого перебудовы доіздовых доріг до копален – ”Безпечно на шахту”.

Джерело фотоґрафіі: PAP/Paweł Supernak