Сумар дня на 15. січня/януара 2024 р.

Приносиме вам сумар медияльной ґрупы ЛЕМ.фм+ на ден 15. січня/януара 2024 р.

Проєктуют обводницю Нового Змигороду

Будова обводниці Нового Змигороду в ясельскым повіті єст на етапі творіня проєктовой документациі. Выбраный был єден з двох вариянтів будовы і трасы. Обводниця для Нового Змигороду єст конечна. В місті крижуют ся дві воєвідскы дорогы: нр 992 (од Ясла) і нр 993 (од Ґорлиц), о інтенсивным руху тяжкых авт ідучых до границі зо Словацийом в Барвінку і в другу страну з полудня Европы. Тягаровы авта ідут центром Нового Змигороду, што єст небезпечне, особливо в зимовым періоді. Обводниця мала бы поправити безпеку м.ін. близко школы. Стараня о будову обводниці тырвали од років. Аж в минулым році дошло до порозумліня воєвідского, повітового і ґмінного самоурядів, і повело ся підписасти догваріня на выконаня проєктовой документациі дорогы. Вариянт выбраный до реализациі буде мал долгіст ок 1 кілометра. Обводниця буде получена рондом з істнуючым одтинком воєвідской дорогы нр 993. Сам кошт выконаня проєкту то понад 730 тис. злотых, з чого 250 тис. покрыє ґміна. Подля рахунків на основі концепциі, кошт реализациі цілого проєкту може вынести понад 23 млн злотых.

Посупуют працы при креницкых інвестициях

Крениця фурт пошырят свою туристичну оферту. Поступуют працы при найбільшій інвестициі, будуваным при ул. Никыфора, близко нижньой стациі колейкы на Паркову Гору, амфітеатрі. Обєкт має служыти як постійне місце пленеровых подій, фестівалів і выступів. Амфітеатр помістит понад 1000 осіб, з чого 300 місц буде під задашыньом. Кєд працы будут іти згідно з гармоноґрамом, то завершат ся в червци/юнію будучого рока. Єдночасно ґміна реализує Водный Пляц Забав на полудньово-західнім боці Парковой Горы, зараз при Загородах Сил Натуры і роверовых трасах. Завершыня робіт єст плянуване на третій квартал будучого рока. Окрем того ґміна отримала консерваторскє позволіня на ревітализаию цілой Парковой Горы, в якой рамках має быти м.ін. вымінене покрытя дакотрых стежок ідучых на верх горы. При ґмінных інвестициях в Креници реализуваны сут і другы задачы, як нп. будова Поляны Музикы і Світел, на котру Польскы Кабельны Желізниц (PKL) і отримали уж позволіня. Процедуване єст тіж позволіня на будову видоковой вежы на верху Парковой Горы. Кєд вшытко піде згідні зпляном, інвестициі PKL мают рушыти уж в будучым році.

Ден Лоґістика в Польковицях

В Польковицях одбыл ся Ден Лоґістика. В його рамках на Учельни Яна Выжыковского были выголошены выклады на тему інноваций в містній лоґістиці, добрых лоґістичных практик на прикладі конкретной фірмы і вызвань в орґанізациі желізничного транспорту товарів. Слухачами были ученикы середніх шкіл з Хоцянова, Ґлоґова, Польковиц і Всховы. В плянах сут цикличны тематичны стрічы того типу, так само в обшыри інформатикы і мехатронікы.

Перегляд Колядничых Ґруп в Рускій Бурсі в Ґорлицях

Припоминаме, што в будучым тыжны, в четвер, 25. січня/януара о год. 10.30, одбуде ся Перегляд Колядничых Ґруп в Рускій Бурсі в Ґорлицях. То подія, яка в попередніх едициях притігала не лем діти, учеників, іх учытелів і родичів, але предовшыткым любителів лемківской культуры. Выступлят ученикы лемківского языка з з Бодаків, Высовоы, Ганчовы, Брунар, Баниці, Ґладышова, Устя, Снітниці і Розділя. Красні просиме!