«Слово» – Праздник Рождества – неділя, 9.00 год.

Є ту праздник Рождества Хрістового. Божый Сын із любви ку нам ставать ся чоловіком. Ікона праздника указує нам духовный розмір праздника. Бог сходить до безсловесія, то є пониже звірят, жебы чоловіка вытягнути горі.

Бог ставать ся чоловіком, жебы чоловіка зробити Богом. Днешнє Євангеліє описує приход трьох вызначных людей, котры перед тым были нерозумныма. Они кланяли ся звіздам як божеству. Коли увиділи єдну надзвычайну звізду, порозумили, же ся народив в Ізраілі Царь, котрый не є звычайным царьскым сыном. Тото узнали із пророцтва свойого опередника Валаама.

Так выдавають ся на дорогу до Єрусалима. Бо собі думали, же де інде бы його мали найти. Не смотрили на многы небезпекы, котры їм грозили по дорозі. Смотрили лем на звізду. Як пришли до Єрусалима, ту ся дізнали, же у Віфлеємі є то місце приходу Царя. Так высланы Іродом із таємным посланьом повызвідовати ся на дітину і дати йому знати, приходять і найдуть там очекованого Царя, про корого ся пустили на далеку дорогу.

Дали йому свої дары – золото, кадило і міро. А напомянуты анелом ся уж не вертають ку Іродови, але по іншій дорозі, ідуть до свойой країны. Они собі не повіли: та што же то? Тадь мы ту пришли з великов почливостьов, а теперь утікаме як злочінці? Наперек тому в їх сердцях была велика радость. А чом? Бо уж не ішли самы.

У своїх сердцях несли собі Новонародженого Царя, котрый уж царьствовав в їх душі. Зато і вшыткы тоты сітуації,  же мусили утікати по лісах і горах, переношали з покойом в сердці. Ірод, котрый прягнув лем за тым, жебы убити Хріста, є образом діавола. Коли грішник приходить ку Хрістови, набывать покій, радость в душі. А ту звучіть голос: не вертайте ся ку Іродови.

Так і праздник Рождества нас позывать ку рішіню ку кому ся обертаме, ку Ісусови або ку Іродови. Бо хоць нам Хрістос указує тоту нову дорогу, але не бере нам слободну волю. Прото приймиме Хріста, а не вертайме ся ку духовному Іродови. Хрістос раждаєтся!

В неділю, 7. януара 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 7. януара 2024 р. о 12.00 год. і 8. януара 2024 р. о 2.00 год. за русиньскым часом.