Сумар дня на 28. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 28. грудня/децембра 2023 р.

Реколекциі священників вроцлавско-щеціньской єпархіі

Як інформувала православна вроцлавско-щеціньска єпархія, в посліднім часі одбыли ся реколекциі священників з кількох деканатів: любіньского, зеленогірского і щеціньского. Любіньскы реколекциі прошли в праздник св. Миколая в церкви в Ліґници, де парохом є о. Любомир Воргач, любіньскій декан. Реколекциі щеціньского деканату прошли 16. грудня/децембра в Старґаді. А реколекциі зеленогірского деканту того рока одбыли ся в Зеленій Горі – подібні як в Ліґници, священникы і вірны зышли ся в праздник св. Миколая Чудотворця (19. грудня/децембра). Вчас реколекций священникы приступували до Таінства св. сповіди.

Чырчаньскы Ромы мают новы помешканя

В селі Чырч на Пряшівскій Руси перед теперішніма святами місцевы Ромы перенесли ся жыти до новых будинків. Староста села Михал Дідик потвердил, же будова новых місц жытя для Ромів тырвала два рокы і коштувало то коло 600 тис. евро. Селу ся на пілотный проєкт подарило здобыти середкы з европейскых фондів в рамках Операцийного Проґраму Людскы Джерела. Люди до новых помешкань село выберало на основі жадости подля многых критерий і так повідаючы за заслугы. Жадателі мусіли мати наприклад роботу, не могли мати долг односно до села і іх діти мусіли мати безпроблемове доходжыня до школы. Умову аренды достало 12 родин, покля што на єден рік. В селі жыє коло 1400 селян, з того скоро пяту част творят Ромы.

В Польковицях чытают книжкы

Як інформує місто Польковиці, лем до 31. грудня/децембра важны сут дотогочасны коды до плятфомы Леґімі, выдаваны через місцеву Містецко-Ґмінну Публичну Бібліотеку. Новы, дармовы коды, якы дозваляют выпожычати книжкы, будут выдаваны од 5. січня/януара 2024 р. Не мож скорше іх резервувати. Новы коды будут выдаваны активным чытачам бібліотекы. Польковицка бібліотека на сайті Polkowice.eu опубликувала десят позиций, якы найчастійше были выпожычаны в 2023 р. На першым місци є книжка «Chłopki. Opowieść o naszych babkach» авторства Йоанны Куцєль-Фридришак.

Уж заран бурсяна велия…

А на конец припоминаме, што уж заран пройде наша велийна стріча. Стоваришыня «Руска Бурса» в Ґорлицях сердечні запрашат на пятницю 29. грудня/децембра на 16.00 год. в своі порогы. На початок выступит бурсяный ансамбль Терочка з нашыма колядками, пак будут вінчуваня, а дале – пробуваня смаків Святого Вечера. Надієме ся і на спільне колядуваня. Варило буде ся в бурсі од самого рана, так што охочы можут прити скорше і помочы варити, або помочы святочні прикрасити бурсяны поміщыня, або почытати бібліотечны новости.