Сумар дня на 21. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 21. грудня/децембра 2023 р.

Екуменічна велийна стріча парляментаристів

Вчера в сідибі польского Сойму одбыла ся велийна стріча парляментаристів. Першый раз в істориі участ в ній окрем представника римокатолицкого Костела, взяли тіж представникы православной Церкви і євангелицкого Костела. Провести стрічу типу екуменічного рішыл новый маршалок Сойму, Шымон Головня. Римокатолицкій Костел репрезентувал кардинал Казімєж Нич. Польску Автокефальну Православну Церкву представлял о. Андрий Левчак, якій поздоровил парляментаристів од імене митрополиты Савы, якій зо здравотных причын не зміг взяти особисто участи в подіі. Слово до зобраных мал тіж єпископ Єжы Самєц, владыка Єванелицко-Ауґсбуржского Костела в Польскій Республиці.

Нове боіско в Коморниках

Ґміна Польковиці скінчыла дальшу інвестицию – спортове боіско в Коморниках. Як інформувал Лукаш Пузнєцкій, бургомайстер Польковиц, інвестиция в Коморниках тішыт з парох причын. По перше зато, што вдало ся отримати зовнішнє фінансуваня для попееґеровской місцевости. Была то тіж потреба самых жытелів села, якы ждали, же такє місце рекреациі і выпочынку гын ся явит. Село находит ся близко ретенцийного озера «Желізный Міст», прото ґміна старат ся на тото, жебы інфраструктура для жытелів была як найліпша – цілю є рекомпенсуваня жытелям того нелегкого сусідства. Ціла інвестиция коштувала більше як 940 тис. зл.

Бортняньска ікона в супрашльскым Музею

До Музею Ікон в Супрашли трафила выняткова ікона з ХVI ст., яка походит з Бортного. «Ікона є цінным дополніньом згромадженых памяток звязаных з обшырю Польской Республикы. Автором іконы є Мастер Деесіс з Бортного. Діла з кругу того мастера мают высокій артистичный рівен. Ікона была написана в опертю о давны взірці (…)» – пише Музей. Сама ікона має характерны карпатскы мотивы. Автор іконы был розпознаный дослідниками на основі ікон з ряду Деесіс з іконостасу церкви свв. Космы і Даміана в Бортным. Творчіст того артисты мала започаткувати малярску манієру, котра была розпознавальна і хоснувана в інчых творах.

ПАПЦ рыхтує святкуваня 100. річниці отриманя томосу

Як поінформувала канцелярия православного митрополиты варшавского і цілой Польщы Савы, православна церков в Польщы заплянувала празднуваня з нагоды 100. річниці отриманя через польску церков автокефалиі. Церков інформує, што ювілейны святкуваня зачали ся уж освячыньом новопобудуваного варшавского храму – церкви св. Софіі, яка была вознесена на памятку православных вывезеных на Сибір, вязненых в лаґрах, жертв Акциі «Вісла», буріня православных храмів на Холмщыні і Підляшы, вересньовой кампаніі 1939 р. і варшавского повстаня. Головны святкуваня мают пройти 13. і 14. листопада/новембра 2024 р. в Варшаві. Товды, в річницю підписаня акту о автокефалиі має быти одслужене святочне богослужыня в варшавскым Соборі, а тіж пройти коцнерт церковной музикы. Церков інформує, же вшыткы подіі будут трансмітуваны в локальных і загальнопольскых медиях. Окрем того митрополия підняла стараня о выданя принагідного значка за посередництвом Польской Почты.