Сумар дня на 19. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 19. грудня/децембра 2023 р.

Пяте выданя книжкы проф. Маґочія

Як поінформувал голова Карпаторусиньского Консорциюм Пілнічной Америкы, Ніколяс Купеньскій, 9. грудня/децембра прошло дальше засіданя консорциюм, в часі котрого бесідувано м.ін. про зреализуваны в остатнім часі подіі. Дві зо споминаных акций тыкали нового выданя книжкы проф. Павла Роберта Маґочія пн. «Our People: Carpatho-Rusyns and Their Descendants in North America/Нашы люде. Карпатскы Русины і іх потомкы в Пілнічній Америці». Обі стрічы прошли в часі конференциі (29. листопада/новембра-3. грудня/децембра) Асоцияциі про славяньскы, східньоевропейскы і евразийскы студиі в Філядельфіі. В часі дискусиі запрошены гості порівнували і анализували пяте выданя публикациі. Як передал Купеньскій, зобраны рецензиі будут опубликуваны в академіцкым часописі в рамках 40. річниці першого выданя той книжкы. Професор Маґочій взял тіж участ в стрічы орґанізуваній філийом Карпаторусиньского Общества в Делавер Валлі, в Філядельфіі, котра так само посвячена была новому выданю, та в цикличній подіі Родинна вечеря. Більше о стрічах присвяченых пятому выданю книжкы проф. Маґочія чытайте на нашым портали.

Велийна стріча в Польковицях

З нагоды ближучых ся різдвяных свят в Польковицях прошла велийна стріча польковицкого одділіня Польского Звязку Пенсіонерів і Інвалідів. Тогорічна акция прошла в польковицкым кіні. Як передала ведуча заряду орґанізаторів, жытелі міста з охотом приходят, то нагода побесідувати, а більшіст з беручых уласт в стрічы то самітны люде. Традицийні заряд зрихтувал для участинків подаркы з ідлом і хімійом. Серед присутных не бракло тіж і представників власти. Желаня зложыл бургомайстер Польковиц, Лукаш Пузнєцкій, якій повіл, што тішыт ся, же ґміна може в безпосередній спосіб підтримати своіх потрібуючых жытелів. Разом зрыхтувано коло 180 подарків з ідлом і понад 20 з хімійом.

Ремонт дорогы в Кунковій

Повітовый Заряд Доріг в Ґолрицях поінформувал, што тырват ремонт повітовой дорогы Шымбарк-Білянка-Устя Рускє на одтинку в Кунковій. Задача реализувана єст в рамках дофінансуваня з резервы цільовой державного буджету на протидіяня і усуваня погодовых наслідств – того рока зо взгляду на дощы. Урядове дофінансуваня отримало 19 повітів в Малопольщы, в тым ґорлицкій, котрый реализує задачу ремонту дорогы в Кунковій. Вартіст інвестициі то понад млн зл, з чого близко 80% вкрыват дофінансуваня. Окрем выміны верхньой верствы дорогы ведены сут тіж працы при перепустах і побочах.

Конкурс на «Найкрасшу Різдвяну Картку» в Команчы

Осередок Культуры в Команчы просит діти і молодіж до участи в плястичным конкурсі на «Найкрасшу Різдвяну Картку». Конкурс направленый єст на учеників і жытелів ґміны Команча в віку од 4 до 18 років і проходит в штырьох віковых катеґориях. Kарткы мож зрыхтувати свобідном техніком – важне, жебы достарчыти іх найпізнійше до 5. січня/януара до єдной з публичных бібліотек в Команчы, Репеди або Щавным. Працы можна тіж переслати на адрес Ґмінного Осередка Культуры в Команчы. Більше дрібниц найдете на фейсбуковым сайті Осередка.

Потягом з Мушыны до Попраду

Так як і в попередніх роках, в зимовым періоді на торы вертат потяг реляциі Мушына-Попрад. Од 30. грудня/децембра в каждый вікенд аж до 25. лютого/фебруара мож буде скорыстати з желізницьового получыня. Потяг буде выізджал о 10.00 год. з Мушыны, а уж коло 11.40 буде на місци – в Попраді. Назад буде мож вернути о год. 15.39. Потяг той реляциі ходит уж од парох років в часі зимовых і літніх вакаций, і што рока притігат многє чысло пасажерів.