Сумар дня на 15. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 15. грудня/децембра 2023 р.

Презентация прототипу Карпатской Обсерваториі в Команчы

Як поінформувало Стоваришыня Карпатскій Еврореґіон, вчера, 14. грудня/децембра в Команчы прошла перша презентация прототипу Карпатской Обсерваториі – фляґового проєкту Еврореґіону, котрого цілю єст спертя рішаючых процесів членів Еврореґіону. В проєкт были заанґажуваны бывшы члены Науковой Рады Карпатского Еврореґіону та в консультацийным вымірі члены орґанізациі. Пілотажова обшыр Обсерваториі то ґміна Команча. Во вчерашній консультацийній стрічы взяли участ з польской страны війтове ґмін Лютовиска, Орлы і Команча і зо словацкой страны бургомайстры Меджелабірців, Спишского Підградя і війт Нижньой Ядловы. По новым році мают рушыти дальшы працы при проєкті.

Працы над проєктом буджету ґміны Польковиці

В Польковицях тырвают фінальны працы над буджетом ґміны на будучый рік. Принятя го радныма єст конечне для фунґуваня основных услуг для жытелів ґміны. Буджетова сесия єст заплянувана на 28. грудня/децембра. Кєд радны, як то вказали на комісиях, не приймут проєкту буджету зрыхтуваного бургомайстром Польковиц, не буде можливости фінансуваня м.ін. безплатной меджеґмінной і меджеповітовой комунікациі, медичной опікы (як услуг хірурґічной порадні, опікунчо-лікуючого закладу, проґрамів здравотной політикы ци регабілітациі) і доплат до дакотрых належности (цін воды і канализациі). Окрем того проєкт обнимат і фінансуваня стоваришынь і спортовых клюбів, та дотациі для непубличныx ясел. Од січня/януара можливы были бы лем выдаткы, котры рішают о продолжаню діяня ґміны на основным рівни. Єдночасно принятя буджету в його актуальній формі не позвалят заховати ліміту задолжыня ґміны на рівни 200 млн зл. Збільшыло бы ся оно до 237 млн зл. На найблизшый понедільок 18. грудня/децембра єст заплянувана стріча ведучого Містной Рады в Польковицях з бургомайстром Польковиц і урядниками одповідальныма за фінансовы справы. Цілю стрічы буде найти спільны розвязаня, котры мают довести до схваліня проєкту буджету на будучый рік.

Нове освітліня в ґміні Крениця

Тырват выміна уличного освітліня в сельскых обшырях ґміны Крениця. Як інформувал бургомайстер Крениці Пьотр Рыба, нове ледове освітліня єст уж замонтуване в Бересті, Полянах, Чырній, Мохначці Выжній, Мохначні Нижній і Мушынці. На яр будучого рока новы уличны лямпы будут замонтуваны в Перунці та в тій части Тылича, в котрій в минулым році освітліня не было вымінене.

Містна велия в Польковицях

Днес, 15. грудня/децембра на польковицкым Рынку єст орґанізувана містна Велия. На подію просит бургомайстер Польковиц Лукаш Пузнєцкій. Початок велийной стрічы єст заплянуваный на 17.00 год. На жытелів Польковиц жде спільне колядуваня, теплы стравы і дрібны подаркы. Подію орґанізує Ґміна Польковиці разом з Центром Культуры в Польковицях.

І Лемківскій Вертеп в Пшемкові

Припоминаме, што уж в тот вікенд, в неділю 17. грудня/децембра в Пшемкові на Нижнім Шлеску одбуде ся І Лемківскій Вертеп. Орґанізатором подіі єст Стоваришыня Лемків, кружок в Пшемкові. Вертеп одбуде ся в Пшемківскым Осередку Культуры. На концерті запрезентує ся Лемківскій Ансамбль Пісні і Танця Ластівочка разом запрошеныма гістми. Початок о 16.00 годині.