ПСК нагородив особности і Підкарпатьске воєводство

В четверь 14-го децембра 2023-го року на Великій сцені Театру Йонаша Заборьского в Пряшові одбыла ся святочна церемонія удільованя Премії Пряшівского самосправного краю (ПСК) за 2023-ій рік i Премії председы ПСК.

Меджі нагородженыма тот рік нашов ся і фолклорный колектів а черезгранічный партнер краю. Пряшівскый край удільованьом нагород оддав честь особностям і колектівам, котры помогли ку розвитку реґіону дома і в загранічу в різных областях жывота.

Не зістали сьме лем дома

„Я гордый, же в Пряшівскім краю маєме такы вынятковы особности і колектівы, котры своїма намагами, завзятостьов і твердов роботов досягли в жывоті великы діла,“ повів председа ПСК Мілан Маєрьскый.

„Но тот рік не зістали сьме лем дома, перекрочіли сьме граніці нашой країны, і за довгорічну співпрацу сьме нагородили і нашого польского партнера з Підкарпатьского воєводства. Вірю, же тота співпраца буде єднако добра і хосена мінімално далшых 15 років,“ продовжовав жупан Маєрьскый.

Премію Пряшівского самосправного краю дістала композіторка і музикантка Любіця Чековска, Фолклорный колектів Врановчан і професорка Анна Еліяшова. Лавреатом Премії председы ПСК став лісник і охранарь Мікулаш Міхелчік, выдаватель, поет і перекладатель Петер Мілчак а Підкарпатьске воєводство.

Нагороджене воєводство

Пряшівксый самосправный край капчать із Підкарпатьскым воєводством довгодоба співпраца, а по 15-ох роках і інтензівне приятельство, пише ся в білтені, якый быв з нагоды удільованя нагород выданый.

Обидва реґіоны довгодобо співпрацують на сполочных актівностях в рамках черезгранічных інштрументів Европской унії, іде головно о піпдору проєктів у области драговой інфраштруктуры, охраны природной і културной дідовизны, турізму, освіты ці жывотного оточіня.

„Взаємны контакты на обидвох боках суть силны і жывы, не зіставають лем на папери ці на уровни офіціалных форумів. Наопак, мають барз конкретну подобу актівностей заміряных на взаємну пропаґацію і підпору. Резултатом є сполочна участь на різных подіях, якыма были наприклад стрічі в рамках меджівладных комісій, моніторінґовых комітетів черезгранічных проґрамів, як і в контексті подій Ініціатівы трьох морь ці Catching-up Regions,“ інформує ПСК.

„Пряшівскый самосправный край собі єдночасно высоко важыть анґажованость Підкарпатьского воєводства при укріпляню позіції Карпатьского реґіону і Карпатьской стратеґії в рамках Европы.“

У партнерів із Підкарпатьского воєводства собі край цінить і актівный приступ, коректны односины, котры пересягли рамкы формалных контактів, а суть барз щіры і сердечны.