«Слово» – 27-ма неділя по Сошествії Святого Духа – неділя, 9.00 год.

Ісус Хрістос нас днешнім словом учіть двом важным моментам в духовнім жывоті. В суботній день приходить до сінаґоґы. Там є єдна жена, котра была згорблена, і не могла ся напростити.

Як Ісус пришов і єй увидів, закликав єй, дотулив ся ньой і говорить: Жено, ты єсь ослободжена од свойой хвороты.

Ісус наперед указує на потребо общой літурґічной молитвы. Многы собі повідять, та ці не дость про мене, коли я буду дома і в тихости буду молити ся ку Богу? Днешнім словом Ісус указує, же окрем особной молитвы є потрібна і обща літурґічна молитва, а сам дає нам приклад свойов участьов на сінаґоґалній молитві.

Тыж указує приклад той жены, котра много терпіла через свою згорбленость. Она не нарікать на Господа Бога, не глядать выгваркы, чом не може брати участь на богослужіню, але в покорі і з великов намагов реґуларно приходить до сінаґоґы на молитву і слуханя Божого слова. На тій жені указує, же так, як она была звязана сатаном, і не могла ся напростити, так было і ціле людство до приходу Хріста звязане до діаволского рабства гріха, страсти, привязаности ку землі.

Можеме то красно видіти на людях, котры жыли перед потопов, коли їм Ной проповідав. Боже слово їх называть, же суть лем земля, же суть лем тіло. Забыли на свою безсмертну душу, жыють лем про тото земне. Діавол згорбив їх душу ку землі, жебы не підняти свої очі ку свойому Сотворительови і ку вічности. Але тримав їх напряменых долов на жалудок і піджалудок, як учіть святый Василій Великый у своїм слові.

Сітуація не змінила ся ани по потопі, хоць мали перед очами тоту страшну траґедію людьского гріха, предці їх то не опамятало, але хотять будовати Вавилоньску вежу, котра буде аж до небес, а будовати собі імя.

Подобно і в часах Господа, што змінило ся – несправедливость, фалшивость, пыха і далшы страсти пановали над людьскым родом. Но приходить Хрістос, а своїм словом, свойов спасителнов смертьов і Воскресіньом піднимать людство як тоту згорблену жену ку новому жывоту.

Так само робить і з каждов душов, котра є згорблена гріхом, страстями, привязаньом до земного і в рабстві діавола. Коли прийде ку Хрістови, Він говорить і нам тоты самы слова: Жено, єсь ослободжена од свойой хвороты, свойого гріха, свойой привязаности, свойой завіслости.. ідь в покою. Слава Ісусу Хрісту!

В неділю, 10. децембра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 10. децембра 2023 р. о 12.00 год. і 11. децембра 2023 р. о 2.00 год. за русиньскым часом.