Сумар дня на 7. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 7. грудня/децембра 2023 р.

Стоваришыня «Руска Бурса» звідала лемківскых представників в СКУтНіЕМ о реакцию

5. грудня/децембра Стоваришыня «Руска Бурса» в Ґорлицях подало писмо до представників лемківской етнічной меншыны в Спільній Комісиі Уряду та Нацийональных і Етнічных Меншын зо звіданьом: ци были підняты даякы діяня, в ціли реакциі на комунікат Інституту Нацийональной Памяти з дня 28. листопада/новембра в справі ремісиі слідства што до акциі «Вісла» і поданых в ним скандаличных арґументів, якы вдарают в добре мено і цілу тяжку долю Лемків другой пол. ХХ ст. Заєдно звідали сме, ци представникы плянуют реаґувати на кривдячы і так само скандаличны тверджыня посланця Конфедерациі Ґжеґожа Брауна, якій 5. грудня/децембра вчас пресовой конференциі в Соймі хоснуючы етнонімы Карпатскы Русины, Лемкы вказал, што брали нибы то они участ в діянях ОУН-УПА по 1945 р. на шкоду польскых громадян, а тіж хоснувал медияльне госло «Piąty rozbiór Polski», односяче ся до звороту лемківскых лісів. В одповіди на звіданя проф. Штефан Дудра поінформувал вчера, што враз з др Мирославом Копыстяньском роблят над писмом до ІНП, а тіж же справу хотят представити на засіданях СКУтНіЕМ.

Сучасна лемківска штука в Коросні

Oд пятниці 8. грудня/децембра в Етноцентрі Коросняньской Землі буде мож обзерати выставу пн. «Внутрішній і зовнішній простір. Образ Лемковины в сучасній штуці». Буде то выбір робіт од лемківскых і польскых артистів. «Єст то оповіст о памяти і єй універсальности в контексті творіня сучасной лемківской достоменности» – подає в анотациі выставы єй куратор – Михал Шымко. Наголовок выставы навязує до фільму Енді Варголя «Outer and Inner Space». Як дальше пише ся в описі выставы: «Історичны і політичны обставины спричынили, же лемківска штука не єст в Польщы знана. Лемковина од давна інспірує польскых артистів, але уж для лемківскых творців бракло місця в польскых музейных колекциях». Выстава буде нагодом, жебы в єдным місци і часі пообзерати творы слідуючых артисток і артистів: Давида Здобыляка, Анны Мариі Зиґмунт, Богдана Карела, Евеліны Коґут, Теодора Кузяка, Мажены Майкы, Володислава Ревака, Андрия Сухорского, Йоанны Спяк, Миколая Федака, Катажыны Шведы, Якуба Якубовича, а тіж самого куратора выставы – Михала Шымко.

Стріча редакциі ЛЕМ.фм+

В минулу суботу 2. грудня/децембра перед святкуванями нашого нацийонального свята – Дня Русинів Польщы, в просторах Руской Бурсы в Ґорлицях одбыла ся стріча редакциі медияльной ґрупы ЛЕМ.фм+. Участ взяли редакторы нашых медий, заєдно з Лемковины, Пряшівщыны, західніх земель, але і Кракова ци Варшавы. Ведуча Стоваришыня «Руска Бурса» в Ґорлицях, Наталия Малецка-Новак представила підсумуваня нашой радийовой діяльности, вказуючы статистикы нашой слухальности і чысло входів на інформацийный порталь www.lem.fm. Дальше редакторы вели дискую о плянях на 2024 р.

Польковиці пропонуют «Мешканя за ремонт»

Ґміна Польковиці рушат з третьом едицийом проґраму, в котрым жытелі Польковиц мают можливіст взяти в аренду од ґміны мешканя в заміну за проведіня в ним ремонту. Проґрам «Мешканя за ремонт» є для осіб, якы не мают власного локум, а при тым не диспонуют фундушами на придбаня власного мешканя. По проведіню ремонтовых прац в даным мешканю, особа, яка іх зробит, буде могла в такым мешканю заселити ся і нанимати го од ґміны. Кєд сте заінтересуваны – треба ся зголосити до Выділу Здоровля Социяльных і Мешканьовых Справ Уряду Ґміны Польковиці. Список мешкань до ремонту был поданый до публичной відомости.