Образ Лемковины в сучасній штуці

Oд найблизшой пятниці 8. грудня/децембра в Етноцентрі Коросняньской Землі буде мож обзерати выставу пн. «Внутрішній і зовнішній простір. Образ Лемковины в сучасній штуці». Буде то выбір робіт од лемківскых і польскых артистів.

«Єст то оповіст о памяти і єй універсальности в контексті творіня сучасной лемківской достоменности» – подає в анотациі выставы єй куратор – Михал Шымко.

Наголовок выставы навязує до фільму Енді Варголя «Outer and Inner Space», премєра якого прошла в Ню Йорку в січни/януарі 1966 рока. Не удоступняли го більше як 30 років, аж до 1998 рока, коли то был він одреставруваный Музейом Сучасной Штукы в Ню Йорку і мал свою премєру як інсталяция в Whitney Museum of American Art в жолтни/октобрі 1998 рока. Фільм накрученый є так, што має ся вражыня, же акторка Еді Седжвік бесідує з невидимом для нас особом, котра є поза кадром, і што быти може бесідує сама зо собом.

«Як суґерує наголовок выставы, зовнішній і внутрішній простір односит ся предовшыткым до особистой (внутрішньой) і материяльной (зовнішньой) сферы соспільного жытя. Презентуваны працы лемківскых і польскых творців улокуваны сут медже тыма двома протиставныма сферами і оперуют на чымси в роді посередньой обшыри» – дознаєме ся з опису выставы.

«Історичны і політичны обставины спричынили, же лемківска штука не єст в Польщы знана. Лемковина од давна інспірує польскых артистів, але уж для лемківскых творців бракло місця в польскых музейных колекциях. Выстава єст пробом выекспонувати іх творчіст. Наголовок выставы єст тіж постулятом, жебы присмотріти ся лемківскым і польскым артистам, што хотят сохранити памят, а і тому, што присутніст Лемків – або частійше іх неприсутніст, бесідує о стані державы або шырше – сучасной культуры» – чытаме.

Выстава буде нагодом, жебы в єдным місци і часі пообзерати творы слідуючых артисток і артистів: Давида Здобыляка, Анны Мариі Зиґмунт, Богдана Карела, Евеліны Коґут, Теодора Кузяка, Мажены Майкы, Володислава Ревака, Андрия Сухорского, Йоанны Спяк, Миколая Федака, Катажыны Шведы, Якуба Якубовича, а тіж самого куратора выставы – Михала Шымко.