Поможме Маестрови

Найпевнійше неє особы з лемківского середовиска, аж і такой, што мало звязана з соспільно-культурным жытьом Лемків, котра бы даколи не чула про Маестра, котрой бы не порушыла Його творчіст, на котру бы она не влинула, а і шырше – про діяльніст цілой родины Трохановскых. Маме взглядом них долг. Можеме го капинку сплатити. Поможме одбудувати хыжу Маестра по пожарі.

В новинах радия ЛЕМ.фм 29. листопада/новембра тр. інформували сме, што ден скорше в Білянці заняла ся огньом родинна хыжа Меастра Ярослава Трохановского. Щестливі пожарникам повело ся сохранити велику част дому перед цілковитым знищыньом, єднак в наслідстві пожару і гашыня го водом вельо треба буде зробити, жебы довести хыжу до нормального фунґуваня.

Цільово інформуєме аж тепер, по парох днях. Не хотіли сме робити туньой сенсациі з факту пожару, набияти сой «входы» на нашых сайтах, кєд же локальны медиі одраз дали знимкы горіючой хыжы – вшыткы про пожар знали. Правда, подали сме віст в інформацийным сервісі, што оген занял хыжу Трохановскых, але ішло головні о тото, жебы дати до відома, што здравотні нихто не потерпіл – факт закликаня додатково двох амбулянсів спричынил пошырюваня ся неприємных і неправильных інфромаций.

По зверифікуваню вшыткых інформаций, будучы в постійным контакті з родином Трохановскых, рішыли сме – як Стоваришыня «Руска Бурса» в Ґорлицях та Стоваришыня Лемків – зорґанізувати соспільну колекту грошів для одбудовы хыжы Маестра.

«Найбільше потерпіла част, в котрій жыл і творил Маестро Ярослав Трохановскій, основатель і долголітній дириґент Репрезентацийного Ансамблю Лемків в Польщы “Лемковина”. На тоту хвилю найпильнійшы ремонтовы працы зосередят ся на выміні електричной інсталяциі в цілій хыжы і части выглядів. Через брак електрикы хыжы не годен огрівати, ніт воды (не робит помпа). Дальшы ремонтовы працы: новы тинкы на стіны і повалу, малюваня поміщынь, новы підлогы і выміна спаленой елевациі» – подаєме в спільным комунікаті при колекті.

«Родинна хыжа Трохановскых вельо років была одкрыта для вшыткых, якым близка была лемківска культура. Была центром і серцьом лемківской діяльности» – констатуєме.

Вкажме, што одкрыты сут і нашы серця – доложме свою злотівку до одбудовы хыжы, най по тых тяжкых пережытях звязаных з пожаром, а і посвячыньом цілого жытя лемківскым справам, Маестро з родином зазнают хоц тілько спокою, што не будут мусіти старати ся о фінансову част вертаня до нормальности.