Сумар дня на 22. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 22. листопада/новембра 2023 р.

В Команчы прошла методично-катехетична конференция для духовных і світскых учытелів православной реліґіі

18. листопада/новембра при парохіі Покровы Пресвятой Богородиці в Команчы одбыла ся методично-катехетична конференция для духовных і світскых учытелів реліґіі Перемышльско-Ґорлицкой Єпархіі Польской Автокефальной Православной Церкви. Стріча зачала ся од спільной молитвы в церкви, богослужыня правил о. митрат Юлиян Феленчак. Конференция прошла в світлиcи Емаус Єпархіяльного Осередка Милосердя Елеос в Команчы. Конференцию очелил ординарий єпархіі архієпископ Паісий. Вступне слово мал о. мит. Юлиян Феленчак, пленарну част конференциі одкрыл владыка Паісий. Пак голос забрал о. прот. др Анджей Коханович, методичный порадник дс. вчыня православной реліґіі при Самоурядовым Центрі Досконаліня Учытелів в Люблині, якій запознал зобраных з темом онляйнового вчыня. О. мит. др Роман Дубец представил проблематику роботы візитатора православной катехезы, а о. мит. Петро Пупчык занял ся квестийом катехетичной роботы з дітми з Украіны. На закінчыня о. прот. Михал Коник, єпархіяльный консультант дс. помочы родині і протидіяню насильству выголосил реферат і провюл варштаты.

Школярі зо школы в Устю Рускым заняли ІІ місце в конкурсі!

Дружына з Комплексу Шкіл в Устю Рускым – в складі Юдита Войташек, Александер Вуйцік і Мацєй Баняк, здобыла ІІ місце в квізі знаня о Малопольщы «Што Ти знаш о Реґіоні?» орґанізуваным Маршалківскым Урядом Малопольского Воєвідства. Звіданя тыкали істориі, культуровой спадковины, традиций, реґіональных продуктів, памяток, туристичных атракций і знаных жытелів Малопольщы. Науковым опікуном выріжненой дружыны была учытелька Барбара Кошык. Школяре вчас конкурсу промували тіж реґіон, з котрого походят – нагороду на торжественній ґали одберали в лемківскым облечыню выпожыченым з колекциі Руской Бурсы. Ґратулюєме!

Неодолга Ден Копальника

Ближыт ся найважнійше свято для копальників – тзв. Барбурка. В календари є то 4. грудня/децембра, коли приводит ся памят о Святій Варварі, покровительці копальників. З той нагоды будут зорґанізуваны торжества на польковицкым рынку. Професия копальника є близка жытелям Мідьового Басену, в котрым находят ся Польковиці. Містны празднуваня заплянувано на суботу 2. грудня/децембра. В проґрамі святкувань упамятняючых копальничы традициі сут головні концерты. Окрем знаных ансамблів, як ґрупа Братанкы ци Tribute to Queen, на сцені запрезенуют ся кус менше знаны артисты, якы наштоден роблят під земльом, а музика то іх гоббі. Молодшы участинкы святкувань будут мочы самому зробити чачко або лаурку для копальників, зас дорослы будут мочы зробити мідяну біжутерию. Окрем того 4. грудня/децембра в польковицкым костелі одбуде ся святочне богослужыня для копальників і іх родин. Каждого рока подібне богослужыня, з нагоды Дня Копальників, правлене єст і в православній парохіі св. Тройці в Любіні.

«Мериндя» і в дорогу!

Співоча ґрупа Руты Увиты печатала свою другу платню, котрой названя то «Мериндя». Членкыні ансамблю надіют ся, што іх цедечко буде особливым почастунком, котрый – так як мериндю, мож взяти зо собом в світ, тішыти ся ним в подорожы ци дати дакому як подарок. Платня была награна в рамках проґраму Карпатскы локальны ініциятивы реализуваного Фундацийом Pro Carpathia. На платни нашли ся співанкы о пастырскій тематиці і традицийны пісні Русинів з обох стран Карпат. В награню помагал ансамбльови Мирослав Боґонь. В склад ансамблю входят головні жытелькы Низкого Бескіду, якы на Лемковину перенесли ся з далекых закутин Польщы, але сут в ґрупі тіж лемківскы співачкы. Платню мож придбати пишучы до ансамблю на адрес: rutyuwite@gmail.com.