В Руськім Керестурі одсвятковали три юбілеї

Три вызначны юбілеї одсвятковали в просторах културного дому в Руськім Керестурі почас третього новембрового вікенду, інформує аґентура Рутенпрес.

В суботу 18-го новембра 2023-го року святочнов академійов войводиньскы Русины припомянули собі 100 років од выданя кодіфікачной книгы Граматика бачваньско-рускей бешеди Гавриїла Костельника, 120 років од передшкольской освіты в Руськім Керестурі, і 270 років освіты в русиньскім языку.

Святочна академія почала державнов гімнов Сербії і гімнічнов пісньов сербскых Русинів. За орґанізатора привітав участных председа Націоналного совіту Русинів Йоакім Рац.

Меджі участныма были представителі державных, покраїньскых, општиньскый і містных властей, а так само передставителі школ, де є навчалный язык русиньскый або ся в них русиньскый язык учіть, предствителі церькви, як і русиньскых інштітуцій а орґанізацій.

Як інформовала аґентура, на початку академії за власти поздоровив участників заступник покраїньского секретаря про културу, інформованя о односины з реліґійныма комунітами Мілан Міціч, а на кінцю сербскый міністер про людьскы і меншыновы права а соціалный діалоґ Томіслав Жіґманов.

„Підкресили, же треба сохраняти свої шпеціфікы і тішыти ся з них, а передовшыткым там належыть освіта і материньскый язык,“ пише Рутенпрес.

В рамках проґраму была одпрезентована історія першой русиньской матерьской школы в Руськім Керестурі, як і вшыткых школ, де ся учіть русиньскый язык, вклкючно єдиной на світі русиньской ґімназії. Тоты школьскы інштітуції одпрезентовали і їх школярі в рамках културного проґраму декламаційов, співанками ці драматічныма выступами.

На кінцю председа русиньского совіту Йоакім Рац подяковав з нагоды споминаных юбілеїв Іріні Папуґа, котра є секретарьом Дружства про русиньскый язык, літературу і културу, за довгорічну роботу на благо сохраніня і пестованя русиньского языка, од матерьской школы, через основны школы і ґімназію.