Підсумуваня конкурсу – чытникы Kindle розділены

Кінцьом літа того рока оголосили сме конкурс, в котрым до выграня были чытникы маркы Kindle. На тот момент веце є серед нас артистів малярів як фільмовців. Вшыткых робіт было близко сто!

Діти з ріжных шкіл, якы взяли участ в конкурсі, плястичні зінтерпретували Мурянкового Шковраночка і госло Лемковина. Надосланых было близко сто малюнків од учеників зо шкіл і предшколів в Баници, Снітници, Ганчовій, Высовій, Устю Рускым, Бодаках, Санковій, Ґладышові, Пшемкові, Радваницях. Были тіж працы індивідуальні присланы через родичів, і з Лемковины, і од Лемків жыючых на заході.

Роботы оцінило триособове жырі в складі: Анджей Жыґадло – артиста маляр, абсольвент краківской Академіі Красных Штук (на напрямах малярство і консервация), автор образу «Деревце», ілюстраций до книжочок для діти з сериі «Баі Русинів і інчых народів», спілоснователь і спілтворця Діґітального Архіву Руской Бурсы, Давид Здобыляк – доктор штукы, абсольвент краківской Академіі Красных Штук, в своім малярстві презентує шырокій темовый спектр, інтересує ся лемківском орнаментиком, Каміля Трохановска – артистичні знаня як Kama.illustration, артистка аматорка, авторка м.ін. ілюстраций до книжочкы зо співанками для діти «Співаночкы про діточкы» ци памяткового плякату спортовых змагань Лемковина Ультра Трейль 2023.

Жырі оцінювало занонимізуваны рисункы – ілюстрациі підписаны были лем порядковым чыслом, посеґреґуваны на окрислены скорше віковы катеґориі. Каждый малюнок доставал окремо пункты за техніку і композицию, за зінтерпретуваня темы та «тото штоси» – субєктивне одчутя оцінюючого. Жырі не мало легкой задачы, што было тіж видно в іх оцінах – о выграній рішыли поєдны пункты. Особы з першого місця отримуют чытникы Kindle.

Результаты:

– катеґория до 5 рочків: І місце – Ніна Феленчак, ІІ місце – Семан Фудаля, ІІІ місце – Матвій Кузяк;

– катеґория од 6 до 9 років: І місце – Осиф Бодак, ІІ місце – Ришард Фудаля, ІІІ місце – Михал Баліньскій;

– катеґория од 10 до 13 років: І місце – Татяна Чухта, ІІ місце – Ева Трухан, ІІІ місце – Юлия Баня.

Інтерпретаций было без мала – тілько, кілько діти. Зрештом – пізрийте самы (ниже презентуєме вшыткы надосланы роботы). Молоды артисты в розмаітый спосіб однесли ся до тем порушаных в вершы – промияня, туга, жданя, надія, а вшытко додатково поміщене в богатым краєвиді Лемковины.

Катеґория до 5 років:

Катеґория од 6 до 9 років:

Катеґория од 10 до 13 років:

Для дозрілышых охочых выграти чытникы запропонували сме фільмовый конкурс. Так само треба было в свобідный спосіб зінтерпретувати задачу – помістити в награню слова: Лемковина, шковраночок, Мурянка. Нихто не рішыл заспівати Шковраночка, але двох участників – Андрий Ковальскій та Мирослав Вограч, смысльні оповіли цілу історию при схоснуваню тых трьох госел. Іх фільмикы мают уж по пару тисячів высвітлінь і оба авторы достают по чытнику. Ґратулюєме!