Сумар дня на 6. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 6. листопада/новембра 2023 р.

Пресконференция в Пряшові

Архієпископ-номінант Йона (Йосиф) Максим, котрый был призначеный за нового пряшівского архієпископа і митрополиту, в пятницю 3. лисопада/новембра пришол до Пряшова. Стрітил ся він з робітниками Архієпархіяльного Уряду в Пряшові і Грекокатолицкой Теолоґічной Факулты Пряшівского Університету, одвиділ і семінарию. Пополудни в просторах Архієпархіяльного Уряду проходила пресконференция, на якій участ взяли, окрем новопризначеного митрополиты, кошыцкій єпарха – архієпископ Кіриль Василь, і апостольскій адміністратор Пряшівской і Братиславскый єпархіі – владыка Петро Руснак. Єромонах Йона подякувал папі римскому Францискови, котрый призначыл го за нового пряшівского архієпископа і митрополиту, як і цілій Церкви. На пресконференциі бесідували і о терміні єпископского рукоположыня новой головы Грекокатолицкой Церкви на Словациі, што пройде  27. січня/януара в Катедральным Соборі св. Йоана Крестителя в Пряшові. Більше на тоту тему чытайте в дописі на нашым портали.

В Польковицях замонтували два новы пристанковы задашыня

Нова інфраструктура находит ся при ул. Желізницьовій. Каждый з пристанків выпосаженый єст в лавку, таблицю на розклад ізды і кош на одпады. Додатково пристанкы од переду сут по части забудуваны, так што подорожуючы будут мочы ся сховати перед вітром ци дощом. Як передала представничка ґміны, роботы помалы ся завершают, а в плянях на будуче єст тіж поставити дальшы задашыня при тій самій улици. Два новы пристанкы станули тіж в Єндрихові.

Значыня дикых рослин в культурі давных Карпат

В четвер, 9. листопада/новембра, о год. 15.30 пройде чергове карпатскє слуховиско, орґанізуване Карпатскым Народным Університетом. Тема стрічы то «Значыня дикых рослин в культурі давных Карпат – Бєщады і Низкій Бескід: віріня, звыкы і символика». Прелекцию вюл буде Адам Шарый, біолоґ з Бєщадского Нацийонального Парку. Стріча буде проходила в  інтернетовой формі, мотузок находит ся на фейсбуковым сайті Карпатского Народного Університету.

Остатні дни на пересланя своіх прац в фотоґрафічных конкурсах «Світ палукоподібных» і «Світ овадів»

Припоминаме, што іщы лем до пятинці 10. листопада/новембра мож зголошувати своі фотоґрафіі в конкурсах «Світ палукоподібных» і «Світ овадів». Оба орґанізуваны сут Осередком Еколоґічной Едукациі в Ожынній, а учат в них можут взяти діти і молодіж з ясельского повіту. Конкурсы проходят в двох віковых катеґориях, для кляс VI-VIII основной школы і учеників середніх шкіл. Цілю конкурсів єст заохочаня молодежы до заінтересуваня фотоґрафійом та природом і єй охороном. Каждый може переслати лем єдну фотоґрафію разом з описом і цифровом версийом на ЦД. До працы треба долучыти зголошыньовый формуляр, котрый находит ся в реґуляміні конкурсу на інтернетовым сайті ОЕЕ. Фотоґрафіі треба переслати або особисто передати до Осередка в Ожынній.

«Бєщады. Море непамяти»

Явила ся нова публикация Станіслава Криціньского «Бєщады. Море непамяти» печатана выдавництвом Libra. Єст то пятый уж том сериі книжок Криціньского посвяченых Бєщадам і іх жытялям. Тым разом автор ближе призріл ся селам, што были знищены при будові Солиньского озера, а тіж і тым, котры находят ся довкола него. В своій книжці Криціньскій презентує м.ін. історию сел Поляньчык, Бережниця ci Мычківці. Як підкрислят автор, днес мало хто памятат, што штучне озеро заляло близко 600 хыж, три церкви, костел, монастыр і цмонтері, лісы, а што більше – історию тых сел.