«Слово» – 21-ша неділя по Сошествії Святого Духа – неділя, 9.00 год.

Ісус часто, хотячі передати людям своє слово, хосновав образны приклады. І днешнє слово нам говорить о такім образнім прикладі о розсівачови, котрый вышов сіяти своє зерно. Но тото зерно попадало на різну землю.

На тверду дорогу, на камянисту землю, до терня, але і на добру землю. Кажде зеренько, котре хоць само в собі было добре, і мало силу принести плод, предсі плод залежав і од той землі, до котрой впало.

Тото зеренько є Боже слово, котре Сын Божый приходши од Отця сіяв. А де сіяв? В людьскых душах. Там, де была тверда дорога, суть тоты, котры слухають або недбало, або без віры, або з планым наміріньом. То видиме на архієреях і фарізеях, котры приходили ку Хрістови не на то, жебы дістали одповідь а увірили, але жебы поїмати на слові. Хто так слухать Боже слово, є легков корыстьов про діавола, котрый краде зо сердця тото слово, якбы його убивать, жебы не принесло плод.

Де была камяниста земля – суть душы, котры слухають і радостно приймають слово, но суть без коріня. Вірять до часу. Коли то дашто стоїть, вымагать то жертву, або треба зазнати переслідованя, терпіня ці понижіня про Боже слово, або коли постигне даяка біда, нещастя, смерть близкой особы, зохабляють то слово і зіставать без плоду.

Терня зясь суть душы, котры тыж приймають слово, але суть конфронтованы з роскошами, богатством, старостями жывота, котры задавлюють слово.

Добра земля суть тоты, котры отвореным, щірым сердцьом слухають, сохраняють і приношають плод в терпеливости. Но днешнє слово не зіставать лем на конштатованю того, на яку землю падать посіяне слово. Але веде нас ку вопросу, яков земльов єм я? Як я приймам Боже слово, котре чую через слуханя в церькви або через чітаня Писма? Веде нас ку тому, жебы сьме собі дали правдиву одповідь.

Но без огляду на то, де бы сьме не належали, нам подавать тоту радостну новину – каждый може быти плодна земля. Першы – отвореностьов на Боже слово. Боже, што мі хочеш днесь повісти своїм словом? Другы – усвідомліньом, же терпіня того віку є недостойне той славы, котра нас чекать в небі. Треті – скоро переходить тото вшытко земне: і богатство, слава, роскошы, старости. Тот, хто повнить волю Божу, жыє подля Божых заповідей – перебывать на вікы.

А так каждый може быти тов плоднов земльов, котра отвореностьов прийме посіяне слово, сохранить го і принесе плод в терпеливости. Слава Ісусу Хрісту!

В неділю, 29. октобра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 29. октобра 2023 р. о 12.00 год. і 30. октобра 2023 р. о 2.00 год. за русиньскым часом.