Сумар дня на 24. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 24. жолтня/октобра 2023 р.

Ґміна Польковиці -взоровом ґміном Нижнього Шлеска

Ґміна Польковиці отримала званя «Взоровой ґміны», выріжніня на рукы бургомайстра Лукаша Пузнєцкого зложыл головный редактор ґазеты «Życie Regionów» – Артур Світонь. В конкурсі участ брало 40 кандидатів з Нижнього Шлеска, з чого выріжнено лем 12, а серед них Польковиці. При оціні конкурсова капітула брала до увагы чысло інвестиций зреализуваных самоурядом, цілю котрых єст піднести рівен жытя мешканців ци охорона іх здоровля, та чысло переказаных фондів на реализацию тзв. мягкых проєктів.. Як підкрислил Світонь, заєдно ґміна, як і місто Польковиці находят ся серед найбарже выріжняючых ся самоурядів в державі. Конкурсова капітула звернула тіж увагу на чысло дофінансувань отриманых польковицкым самоурядом з зовнішніх джерел ци чысло інвестиций веденых з думком о середовиску. Выріжніня скоментувал бургомайстер Пузнєцкій, котрый зазначыл, што єст то чест для ґміны, а самоурядовців тішыт, што реализуваны інвестициі сут доціняны. Офіцияльне вручыня статуй «Взоровой ґміны» пройде в листопаді/новембрі в часі торжественной ґалі.

Наступна нагода, жебы обізрити «Лемківскій Триптих»

Для тых, котры не могли видіти або забыли о выставі пн. «Лемківскій Триптих» в бортняньскій церкви, маме добру новину – 26. жолтня/октобра пройде наступный вернісаж той же выставы. Фотоґрафіі авторства Яцка Косібы, ґорлицкого фотоґрафіка тым разом  презентуваны будут в Ґалериі Стара Реміза в курорті Высова, де мож буде іх обзерати до 24. листопада/новембра. Яцек Косіба з фотоґрафуваньом звязаный єст од близко 70 років. Управніня інструктора фотоґрафіі отримал од Міністра Культуры і Штукы в 1978 році. Показал парунадцет темовых індивідуальных та пару ґруповых выстав. Отримувал выріжніня і нагороды в реґіональных і загальнопольскых конкурсах. Фотоґрафує бывше і теперішнє ґорлицкой землі, в тым вельо звязаного з Лемками і Лемковином. Одкрытя выставы пройде в найблизшу пятницю о год. 16.30.

Про конфесийны односины та жытя Ромів в Бєщадах мож буде послухати в час найблизшых двох Карпатскых Слуховисках

В найблизшу середу 25. і пятицю 27. жолтня/октобра пройдут дві стрічы реализуваны в рамках Карпатскых Слуховиск. Перша посвячена буде темі конфесийных односин в Бєщадах та Низкым Бескіді, а друга стріча тыкала буде жытя Ромів в Бєщадах в меджевоєнным періоді. Обі прелекциі попровадит Роберт Банькош, головный специялиста до справ Туристикы в Уряді Міста Санок, провідник в Музею Народного Будівництва в Саноку і долголітній діяч для розвитку і підтримуваня локальной культуры. Стрічы будут проходити онляйн, мотузок находит ся на фейсбуковым сайті Карпатского Народного Університету. Подія реализувана єст в рамках задачы «Фредро в Бєщадах і Низкым Бескіді» дофінансуваной з буджету Підкарпатского Воєвідства.

Школы в Бодаках буде термомодернізувана

В минулым тыжни війт ґміны Санкова, Малґожата Малух підписала умову на термомодернізацию будинку Основной Школы в Бодаках. Окрем термічного забезпечыня школы, додатково рішено замонтувати в будинку одвертальны джерела енерґіі – помпы тепла та фотовольтаічну інталяцию. Задача буде реализувана фірмом Боґдана Романка, і кєд вшытко буде ішло згідні з пляном, то закінчыт ся в половині грудня/децембра того рока. Проєкт єст частю проґраму «Термомодернізация обєктів публичного хосну в ґміні Санкова» фінансуваного з Операцийных Середків Малопольского Воєвідства.