Сумар дня на 23. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 23. жолтня/октобра 2023 р.

Росия анулювала меншынову конвенцию

Як подала Польска Пресова Аґенция за украіньскым Радийом Свобода, Владимір Путін підписал в минулый четвер уставу о выповіджыню Росийом рамовой Конвенциі о охороні нацийональных меншын. Конвенция має на ціли охорону нацийональных меншын перед дискримінацийом, промує захованя іх культуры, реліґіі і традиций та запевнят право до свобідного хоснуваня іх языка. Єй сторонами єст 38 держав (не рахуючы уж Росиі) з 47 членів Рады Европы. Причыном анлюваня конвенциі был подля Путіна дискримінуючый підхід до Росиян в рамках конвенциі. Державна Дума (низша ізба росийского парляменту) выповіла конвенцию 10. жолтня/окробра. В марци минулого рока Росия была єдноголосно вышмарена з Рады Европы. Радийо Свобода припомнуло, што в лютым/фебруарі тр. Державна Дума приняла уставу о выповіджыню Росийом 21 трактатів з Радом Европы, в тым Конвенцию о правах чловека.

«Безпечна Польковичанка»

В Польковицях тырват перша едиция проґраму бургомайстра Польковиц Лукаша Пузнєцкого пн. «Безпечна Польковичанка». В його рамках жытелькы ґміны можут брати участ в дармовым курсі самообороны. В минулым році прошол пільотажовый проґрам, котрый вказал, што така акция єст барз потрібна в місті, зато його власти рішыли зорґанізувати в тым році полну едицию «Безпечной Польковичанкы». Дотля в єй рамках одбыло ся пару занять в ґімнастичній сали, пабі і автобусі містной комунікациі. Дальшый тренінґ в терені одбуде ся в наступный четвер 26. жолтня/октобра. За орґанізацию акциі одповідат Выділ Промоциі, Туристикы і Соспільной Комунікациі Уряду Ґміны Польковиці.

Карпаторусиньскій Семінар

Припоминаме, што днес з нагоды святкуваня Дня Русинів в ЗША одбуде ся Карпаторусиньскій Семінар. Буде він мал онляйнову форму, пройде через плятформу ZOOM. Подію орґанізує Карпаторусиньскє Товариство. Семінар буде вюл проф. Павел Роберт Мачоґій. Звіданя, на котры одповіст, то м.ін.: як выглядало жытя нашых предків в ХІХ столітю і што на тото влияло, як реформы Габсбурґів змінили іх жытя, хто жыл вколо них і входил з нима в реляциі – Словакы, Мадяры, Німці, Жыды і інчы. Сесия з проф. Маґочійом буде інтерактивна – орґанізаторы рекомендуют прирыхтувати своі звіданя до дискусиі. Для тых, котры не можут взяти участи нажыво, вебінар буде награный. Семінар зачне ся о год. 4.30 східньоамериканьского часу, значыт о год. 10.30 вечер нашого часу. Мотузок до стрічы находит ся на інтернетовым сайті орґанізатора.

Презентация русиньского выданя часопису Plav 

Припоминаме і о днешнім вечері в Чытальни Unijazz в Празі, вчас котрого буде одпрезенуване выданя часопису Plav присвяченого русиньскій літературі. Початок о 19:00 год. Plav – то чешскій часопис про світову літературу, якій выходит од 2005 рока. Чысло 8 з 2023 р. є присвячене русиньскій літературі, і часопис презентує досправды шыроку скалю літературы карпатскых Русинів. На мультіжанровым вечері на участных жде не лем чытаня русиньской літературы в чешскым перекладі, але так само музика ци авдийовізуальны проєкциі. Більше про русиньскє выданя часопису і його презентацию прочытате в дописі на нашым портали.