Русины вже офіціално мають третього члена народностного выбору

В понедільок 23-го октобра 2023-го року в просторах Уряду уповномоченого влады Словацькой републікы про народностны меншыны проходила вольба двох новых членів Выбору про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность.

Уповномоченый про меншыны Ласло Буковскый вольбу выписав на основі зміны штатуту із 29-го септембра того року, в рамках котрой народностный выбор схвалив, же вєтнамска меншына, яка была офіціално вызнана на Словакії в місяці юн того року, буде мати у выборі єдного члена, а так само ся на основі резултатів списованя жытелів дасть Русинам, котры мали дотеперь двох членів, о єдного веце.

Уряд уповномоченого публіковав вызву на реґістрацію кандідатів і орґанізацій, котры хотять голосовати у вольбі члена за вєтнамску і русиньску меншыну, а так само за заступинків членів выбору, публіковав 4-го октобра, і термін реґістрації быв до 17-го октобра.

За русиньску меншыну пришло лем по єдній номінації на члена і на заступника члена выбору. На члена кандідовав Мартін Караш, председа Русиньской оброды на Словеньску, котрый дотеперь быв заступником члена выбору, а на заступника кандідовав Мафтей Допіріяк, сучасный секретарь Округлого стола Русинів Словакії.

На вольбу зареґістровало ся вісем русиньскых обчаньскых здружінь, котры заголосовали за зареґістрованых кандідатів.

Одтеперь Выбор про народностны меншыны і етнічны ґрупы має за русиньску народностну меншыну трьох членів – Мартіна Караша, Петра Медвідя і Мілана Яна Піліпа, а так само двох заступників членів – Петра Штефаняка і Мафтея Допіряка.

По новому трьоми представителі Русинів уж будуть участны на найблизшім засіданю народностного выбору, котре є наплановане на децембер того року.

Найвеце членів выбору, аж пять, має мадярьска народностна меншына, по ній наслідують Ромове із штирьома членами. Русины з трьома представителями у выборі закінчують список великых меншын. По двох членах має іщі чеська і україньска меншына, решта народностных меншын має у выборі по єднім членови.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА