ТАД одпремєрує приповідку Сіль над золото

Театер Александра Духновіча по двох роках знова потішыть найменшу публіку. В пятніцю 20-го октобра 2023-го року одпремєрує на своїй Великій сцені в Пряшові припоповідку Сіль над золото, котра належыть до студника словацькых народных приповідок.

Історія о трьох дівках і пышнім кральови інсценована на професіоналній русиньскій театралній сцені буде подля творців повна масок, гумору, рухів, чарівных возиків як і поезії.

„І в іншых театрах то звыкне фунґовати так, же по році і пів, двох роках звыкне робити ся нова приповідка, та і мы приступили на тото. З режісером сьме конзултовали, котру выбереме. Сіль над золото є позната і мила приповідка. Не хотіли сьме даякы войновы, биткарьскы, значіть, тов милов приповідков хочеме ословити нашых найменшых зрітелів,“ повів на пресконференції директор Театру Александра Духновіча Маріян Марко.

За його словами є інтерес дітей о приповідкы в театрі великый і їх реакції суть щіры. „Кедь ся дітям штось любить, та то оцінять. Покля ся дашто не любить, пак вырушують або і одходять із представліня,“ доповнив директор.

Сіль над золото як гость в ТАД режіровав Каміл Жішка, котрый уж в театрі робив пєсу Вісем жен. „Сіль над золото все буде темов, на котров можеме ся задумати, же што є властно в жывоті важным,“ повів режісер.

Тескт пєсы быв оріґінално написаный у віршах, но в театрі го переробили до прозаічной подобы і зробили з того театер масок.

„Тота приповідка має просту дію, котра ся дає розповісти трьома речінями, але все дітей фасцінує. Кедь маєте добру дію і історію, про режісера уж є лем єдна задача, жебы то атрактівно одкомуніквоав з публіков. Мы вырішыли про путь картовых масок на паліцях, з котрыма пять акторів грає много роль, і тым бы сьме хотіли заінтересовати дітячу публіку,“ пояснив режісер Жішка.

Каміл Жішка є і автором музикы в представліню, а приповідка має флексібілну форму, котра уможнить ходити з ньов і мімо сцены в Пряшові.

В новій приповідці Сіль над золото грають Володимір Рогач, Мартін Оравец, Владиміра Штефанікова, Зузана Ковалчікова і Даніела Либезнюк. Переклад пєсы робив Валерій Купка.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА