Сумар дня на 17. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 17. жолтня/октобра 2023 р.

Pарохіянe з Ганчовы празднували 65. років одновліня церковного жытя

14. жолтня/октобра Православна Парохія в Ганчові святкувала річницю 65. років одновліня церковного жытя. В празднуваню участ взял архієпископ перемышльскій і ґорлицкій Паісий. Святу Літургію одправил владыка разом з духовныма з креницкого деканату та о. архімандритом Теофільом, о. митратом Василийом Ґалчыком і протодіаконом Антоні Ярым. В часі Божой Літургіі молили ся за мир на Украіні і жертвы Акциі «Вісла», а тіж за вшыткых вірных і духовных парохіі. На конец службы владыка подякувал ганчівскому духовному о. Владимірови Канюкови за дбаня про церков і вірных православной спільноты. Aрхієпископ нагородил вшыткых парохіян з Ганчовы медальом св. Максима Ґорлицкого.

Повна траса Via Carpatia штораз то ближе

На Словациі одкрыли наступный одтинок медженародной трасы Via Carpatia. Одданый до хоснуваня І етап обводниці Пряшова має долгіст понад 4 км. На обводници находит ся аж 9 мостів і тунель долгости кілометра. Кошт будовы нового одтинка то аж 143 млн евро. Разом з одданьом І етапу інвестициі положеный был угольный камін під будову ІІ етапу, котрый буде рахувал 10 км, а на ним найде ся 12 мостів і єден тунель. Згідні з пляном будова закінчыт ся до 2027 р. Словацка Державна Автострадова Спілка онедолга оголосит конкурс оферт на проєктову документацию наступных трьох одтинків медженародной дорогы. Як і попередні части дорогы, новы одтинкы будут фінансуваны з унійного проґраму «Єднаючы Европу».

Лемковина Ультра Трейль 2023

Уж в найблизшый вікенд 21. і 22. жолтня/октобра на Лемковину придут спортовці і аматоры з цілой Польщы і не лем, жебы взяти участ в тогорічній едициі Лемковина Ультра Трейль. Біговый фестіваль тішыт ся великом популярністю. До каждой едициі зголошує ся штораз то більше участників, а серед них росне і чысло Лемків. Спортовці і аматоры біганя можут выбрати єдну з 6 трас – долгости 150, 100, 70, 48, 30 або 10 км. Участникы ЛУТ будут стартувати з Крениці, Івонича, Гыровой, Рыманова і Команчы, а першы выстартуют уж о 1.00 год. в ночы в суботу з креницкого дептака. Мета і вручыня грамот, так як і в попередніх роках, пройде в Команчы. Партнетом подіі є Підкарпатскє Воєвідство.

Повіт Польковиці може ся похвалити дальшом зеленом ініциятивом

Жытелі Собіна, повіт Польковиці, разом зо своім шолтысом, сельском радом, підопічныма і опікунами з Повітового Центра Допомогы Родині Польковиці, працівниками Польковицкого Заряду Доріг та містецкыма радныма стрітили ся на спільне саджыня дерев вздолж повітовой дорогы. Акция проходила в суботу 14. жолтня/октобра. В рамках подіі повело ся посадити 100 стук медоносной липы.

То уж остатня нагода на пересланя своіх знимкы до конкурсу «Шляк Волошской Культуры»

Припоминаме, што іщы лем через тыжден мож слати своі працы в фотоґрафічным конкурсі «Шляк Волошской Культуры» орґанізуваным Стоваришыньом Pro Carpathia. Цілю акциі єст популяризувати знаня на тему Шляку Волошской Культуры на обшыри підкарпатского воєвідства. Пересыланы знимкы мусят ся односити до культуры, традиций ци пастырскых обрядів або памяток і місц звязаных з Лемками, Бойками і жытелями Карпат. Каждый участник може переслати майльом до 23. жолтня/октобра максимальні 3 працы. Конкурсова капітула нагородит трьох найліпшых туристичныма бонами до выкорыстаня в выпочынковым осередку в Бєщадах. Дрібниці находят ся на інтернетовым сайті Стоваришыня Pro Carpathia.