Желізничны дворці в Долині Попраду готовы

Польска Державна Желізниця удоступнила подорожуючым 12 желізничных дворців в Долині Попраду. Даякы были змодернізуваны, інчы збудуваны од основ. Разом кошт перебудовы і будовы двроців вынюс 84 млн злотых. Інвестиция обняла тіж дворці в лемківскых селах м.ін. в Верхомли, Жеґєстові ци Милику.

Разом ПДЖ оддала в малопольскым воєвідстві модерны дворці аж в 17 локализациях, з чого 12 находит ся в Долині Попраду. «Вшыткы інвестициі были зреализуваны в рамках найвекшого в істориі польской желізниці проґраму модернізациі та будовы новых дворців» – подає Іреней Масляный, член заряду ПДЖ.

Старе з новым

«В рамках нашой інвестициі повело ся змінити вид дворцьовых будинків в тій части Малопольщы – через получыня історичного характеру з модерном функцийональністю. Выбудували сме тіж пару чысто новых обєктів, што сполнюют модерны стандарды обслугы пасажерів, а заєдно своім выглядом вписуют ся в краєвид реґіону» – додає.

Модерны получыня підносят рівен жытя мешканців реґіону. Через тото ведена є борба з комунікацийным выключыньом. «Европейска Унія підперат приязный для середовиска транспортовый систем, ци то з державных ци реґіональных проґрамів. Модернізация дворців в Долині Попраду єст барз успішным приміром схоснуваня середків» – бесідує Лукаш Смулка, віцемаршалок малопольского воєвідства.

Жеґєстів з вынятковым обєктом

Інвестиция обняла разом 12 обєктів. Перебудуваны і достосуваны до сучасных стандардів, а тіж обняты консерваторском опіком были дворці в Верхомли, Жеґєстові, Жеґєстові-Здрою, Пивничній, Пивничній-Здрою, Рытрі, Барціцах, а тіж в Старым Санчы.

Перебудова вязала ся в реновацийом історичных елементів і достосуваньом до сучасных потреб і будовляных переписів. Для приміру, дворец в Жеґєстові-Здрою был побудуваный іщы в 1876 році. Під архітектонным оглядом, то найцікавшый того рода обєкт в Долині Попраду. В рамках перебудовы не змінили історичной структуры дворця, але метаморфозу перешла середина будинку і тото, што довкола.

Зас в Милику, Зубрику, а тіж в Ломници-Здрою, Млодові вознесли чысто новы будинкы з простором до хоснуваня до 100 квадратных метрів. Выгляд достосували до околиці, а середина єст достосувана до модерных стандардів обслугы подорожуючых. Невеликій обєкт в Милику презентує мінімалистичный стиль, але навязує до гірской архітектуры.

Для вшыткых

Вшыткы дворці достосували до обслугы подорожуючых о ограниченій мобільности – старшых осіб, родин з дітми та осіб з неполносправностями. Сут означыня в шрифті Брайля, дотыковы пляны будинків, є контрастова кольористика середины, зліквідували архітектонны барєры. Дворці сут тіж барже еколоґічны – систем БМС (BMS Building Management System) тримат контролю над оптимализацийом хоснуваня електрикы, тепла, воды.

При дворцях поставили роверовы стоякы, сут новы стежкы, місця до паркуваня. Замонтували лавкы, кошы. Разом інвестиция взяла 84 млн зл. На дворец в Милику выдали 6,43 млн зл, в Верхомли 5,43 млн зл, в Зубрику 4,70 млн зл, а в Жеґєстові і Жеґєстові-Здрою одповідньо 7,15 і 7,62 млн зл.