Сумар дня на 11. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 11. жолтня/октобра 2023 р.

Землетрясіня в Словациі

В понедільок вечером коло 20.20 год. дошло до землетрясіня о магнітуді 4,9. Епіцентр находил ся близко русиньского міста Стропків. Трясіня чути было практичні в цілій східній Словациі, м.ін. в Пряшові, Гуменным, Меджелабірцях ци Кошыцях. Гіпоцентр находил ся на глубокости 10 км. З рапортів выникат, што трясіня было чути в радусі 200 км, аж і в Польщы в околоциях Кракова ци Катовиц, але тіж на Украіні і Мадярах. Трясіня могло одчути аж і 6 млн люди. Част в страху лишала хыжы і хоронила ся на зовни будинків. Серед шкід, якы выникнули вчас землетрясіня, є м.ін. пошкоджыня конструкциі грекокатолицкой церкви в русиньскым селі Пакостів. Пошкодженый є і памятник присвяченый жертвам нацистичных репресий в селі Токаік. Памятник Токаіцкой Траґедиі зробил русиньскій скульптор Франтішек Ґібала, а в остатніх роках перешол ревітализацию. Тепер будут мусіти го зреконструувати.

Новы інвестициі в Польковицях

Mіністер Кжыштоф Кубув, шеф Політичного Ґабінету Премєра Матеуша Моравєцкого передал в минулый понедільок на рукы бургомайстра Польковиц Лукаша Пузнєцкого чекы на 23,5 млн зл для ґміны Польковиці на важны соспільны інвестициі, в тым на будову новой части шпыталя в Польковицкым Центрі Здравотных Услуг. Нова шпытальна част буде складала ся з двох поверхів. На першым буде утворена працовня маґнетичного резонансу, на черговым – розбудуют Опікуньчо-Лікуючый Заклад вєдно з ґериятричным центром. 960 тис. зл дофінансуваня перезначат на будову ул. Полудньовой в шолтыстві Суха Ґурна. Вчас понедільковой стрічы шеф Політичного Ґабінету Премєра передал чекы на квоту близко 100 млн зл для ріжных підметів. З урядового підпертя скорыстал і Союз Ґмін Мідьового Басену, якій позыскал з Польского Ладу 8 млн зл на реализацию другого етапу і розбудову Пункту Селективного Збераня Комунального Смітя. Од початку той каденциі ґміна Польковиці здобыла веце як 170 мнл зл урядовой помочы на найважнійшы з соспільного пункту пізріня інвестициі.

Видокова вежа над Удольском Скалком

В єдным з русиньскух сел на Словациі одркыли нову видокову вежу – тот раз над Удольском Скалком в обшыри села Удол, старолюбовняньского окресу. Триплянтрова вежа має высокіст 14,2 м. Будова вежы зреализувана была з рамках проєкту реконструкциі біциґльовой альтаны, яка находит ся близко вежы. Зас вежа з альтаном находят ся близко роверовой стежкы, котра лучыт село Удол зо селом Плавеч. В найвысшого поверху вежы мож позерати на панораму околиці – видіти такы села як Плавниця, Громош, Люботин, Шаришскє Ястрабя, Гайтівка, з видоковой вежы видно і градну вежу Любовняньского Замку. Обєкт вознесли літом того рока, головні зо смерекового дерева. При вежы находит ся інформацийна таблиця, і што вартат підкрислити – інвесторы взяли до увагы, што вежа находит ся в русиньскым реґіоні, зато текст на таблици є в двох языках – по словакцы і по русиньскы.

Рішали про фінансы

Як подає аґенция Рутенпрес – в віторок в Домі Культуры в Рускым Керестурі прошло засіданя Нацийонального Совіту Русинів, вчас котрого рішали про Фінансовый Плян за теперішній рік. Попереднє такє засіданя прошло в марци. Предсідатель Нацийонального Совіту Якым Рас перше справоздал діяльніст з періоду медже засіданями. Фінансовый Плян приняли єдноголосно, а повело ся го збілянсувати завдякы додатковым середкам высокости веце як 2 млн дінарів, якы походили з джерел на прокрайскым і республичным рівни. Найвекша част буджету трафит до Одбору за Освіту на упамятніня важных річниц, м.ін. 270. річниці вчыня в Сербіі по русиньскы, 120 років предшкільной русиньской едукациі ци 100. річниці печатаня ґраматикы русиньского языка в бачваньскым вариянті. Вчас засіданя участникы приняли і справопис Ревізийной Комісиі за діяльніст Нацийонального Совіту Русинів в 2022 році та выбрали Ревізийну Комісию на тот рік.

Фот. www.ruskeslovo.com