Сумар дня на 9. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 9. жолтня/октобра 2023 р.

Одбыла ся ХХХІ Лемківска Творча Осін

В минулый вікенд 7.-8. жолтня/октобра на Лемковині проходила ХХХІ Лемківска Творча Осін. Подія каждого рока є присвячена даякій знаній особі з істориі і культуры Лемковины, ци шырше Карпатской Руси – тогорічна едиция в першій черзі была посвячена 180. річници народжыня Матвія Астряба – педаґоґа, історика і публицисты, автора аполоґіі лемківского языка. Зато першый ден подіі проходил в Высовій, де Астряб ся народил. Другій ден подіі проходил в просторах Руской Бурсы в Ґорлицях. Дальшы річниці споминаны вчас тогорічной Осени то 120. річниця народжыня лемківского байкаря Миколая Буряка та 100. річниця народжыня лемківского писменника і поеты Нестора Репелы. Доповіди про Матвія Астряба, Миколая Буряка і Нестора Репелу выголосили вчас подіі др габ. Олена Дуць-Файфер і Петро Трохановскій. Окрем того выступили гості-прелеґенты з Польщы і заграниці. В Высовій з артистичным проґрамом выступила діточа ґрупа бурсяного ансамблю Терочка, а бурсяны просторы своім выступом прикрасили Дария Кузяк і Ольга Стариньска, в рамках свойой музичной ремінісценциі «Лемковина-Рим». Подію зорґанізували Стоваришыня Лемків і Стоваришыня «Руска Бурса» в Ґорлицях.

XVI Стрічы Трьох Поколінь о нецілы два тыжні

Ближыт ся дальша подія орґазнізувана Стоваришыньом Лемків – Кружком в Пшемкові. XVI Стрічы Трьох Поколінь одбудут ся в вікенд 21.-22. жолтня/октобра. Тогорічны Стрічы потырвают два дни – першый ден подія пройде в Пшемкові, а другій в Радваницях. На концертах запрезентуют ся ґаздове – ЛАПіТ «Ластівочка», його діточа ґрупа «Ластівчата» і запрошены гості. Хоц орґанізаторы мают уж цілый проґрам рішеный, несподіванком буде, якы ансамблі окрем ґаздів будут ся презентувати на обох сценах. Стрічы Трьох Поколінь то подія, яка каждого рока громадит великє чысло Лемків з Пшемкова і околиц та іх польскых приятелів. В суботу 21. жолтня/октобра подія одбуде ся в Пшемківскым Осередку Культуры, а о ден, в неділю 22. жолтня/октобра, в Ґмінным Осередку Культуры в Радваницях. Початок о 16.00 год.

В перспективі желізничны получыня з центра Ґорлиц

PKP Польскы Желізничны Леніі оголосили конкурс оферт на проєктову документацию обнимаючу зліпшыня получыня Краків-Ясло разом з ревітализацийом леніі нр 110 Ґорлиці Загіряны – Ґорлиці і будовом лучниці. Задача обнимат м.ін. опрацуваня документациі на будову близко 700-метровой лучниці медже леніями нр 110 Ґорлиці Загіряны – Ґорлиці і нр 108 Сторожы-Коростенко, перебудову стаций Ґорлиці і Ґорлиці Загіряны та пристанку Ґорлиці Ґлиник. Будова лучниці позволит на рух потягів з центра Ґорлиц безпосередньо в сторону Сторожів, Тарнова і Кракова, без конечности візду на стацию Ґорлиці Загіряны. Додатково з новой інфраструктуры мали бы корыстати самоурядовы потягы Малопольскых Желізниц. PKP подало, што будовляны працы звязаны з плянуваном модернізацийом повинны ся зачати в 2026 р. і завершыти під конец 2028 р.

Соспільны стрічы в Польковицях

Бургомайстер Польковиц Лукаш Пузнєцкій просит на социяльны стрічы тыкаючы опрацуваня технічной документациі будовы біциґльовой дорогы вздолж ул. 3 Мая в Польковицях. Одбудут ся они заран, в віторок 10. жолтня/октобра о год. 18.30 в Уряді Ґміны Польковиці.