«Слово» – 18-та неділя по Сошествії Святого Духа – неділя, 9.00 год.

Ісус Хрістос приходить ку Ґенесарітьскому озеру. Зышло ся там множество людей. Ісус пришов ку лодькі, котра належала Сімонови Петрови, і попросив го, жебы одплавав од берега, і так учів людей.

Як закончів свою науку, повів Петрови: Спустьте сіті до глубшой воды. Но Петро як знатель ремесла, говорить: Учітелю, мы цілу ніч ся намагали і нич мы не хопили, але на твоє слово я так зроблю. А коли Петро послухав, хоць розум йому говорив: Тадь то не мать смыслу. Я ліпше знам, коли ся ловлять рыбы. Але сердце йому говорило: Послухай. Тогды поїмали велике множество рыб.

Тот великый лов рыб мав указати апостолам, котрых собі Ісус покликав, же коли будуть робити согласно з Його словом, не мусять бояти ся ничого. При першім посланю, коли Ісус їх іщі не посылать ку поганам, як ся вернули, свідчіли: Господи, в твоїм імени нас і духы слухають. А коли їх послав перед Вознесіньом, повів: Ідьте до цілого…

Уж лем то єдно, же їх посылав самых, а Він сам од них одходив, могло выкликати з того людьского страх, неістоту. А Ісус такой реаґує: Я з вами по вшыткы дні аж до кінця світа. Апостолы розышли ся по цілім світі і проповідали, а Господь потверджовав їх науку чудесныма ділами. Они якбы одповіли: На твоє слово ідеме. А далше уж Господь робив діло.

А посмотьме на Вавілоньску вежу: там повіли, же они будуть самы будовати вежу аж до неба і збудують собі імя. А як смутні допали. Подобно далшы імперії світа, котры гордили ся, ці в далекій минувшыні або недавны імперії, вшытко розпало ся.

Но Діло апостолів, реперезентоване в словах, на Твоє слово спущу сіті, перебывать дотеперь. Так і наш жывот, коли є будованый на скалі Божых заповідей. Коли будеме робити і жыти на Божу славу, подля Хрістовых заповідей, подобно слову даному Господу, на твоє слово так зроблю, тогды наш жывот буде успішный і плодный як лов рыб апостолів.

А як собі повіме, мы собі хочеме жыти подля себе, іґноруючі Божы заповіді, не глядаючі Божого благословіня, выслідок буде тогды, як слова Петра: Нич мы не хопили. Слава Ісусу Хрісту!

В неділю, 8. октобра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 8. октобра 2023 р. о 12.00 год. і 9. октобра 2023 р. о 2.00 год. за русиньскым часом.