Сумар дня на 6. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 6. жолтня/октобра 2023 р.

Вернула контроля на польско-словацкій граници

В тоту середу 4. жолтня/октобра часово вернула гранична контроля на польско-словацкій граници. Ден перше поінформувало о тым в комунікаті Міністерство Внутрішніх Справ і Адміністрациі. Як подал міністер МВСіА Мариюш Каміньскій, «Контролі будут ведены лем в напрямі візду до Польщы. Границі буде мож перекрочыти лем в вызначеных місцях». Як мож чытати в комунікаті – «цілю введіня граничных контролі є протитіяня нелеґальній міґрациі з балканьского шляку». Контроля буде тырвала до 13. жолтня/октобра, з можливістю продолжыня. Деталі чытайте в дописі на нашым портали. Актуально границі мож переіхати через 8 дороговых переходів: Радошыці, Барвінок, Мушынка, Пивнична, Юрґів, Хыжне, Корбєлів і Зврадонь та через три потяговы: Лупків, Мушына і Зврадонь. Додатково сут одкрыты пішы переходы, але лем для громадян Евросоюзу, держав EFTA, ЕЕА, Швейцарской Конфедерациі, іх партнерів і діти. Сут то переходы: Ожынна, Конечна, Лелюхів, Нєдзиця, Лыса Поляна, Хохолів, Вінярчыківка, Уйсолы, Бур, Зврадонь і Яворинка.

ХХХІ Лемківска Твора Осін

Уж заран початок ХХХІ Лемківскій Творчій Осени. Подія каждого рока проходит на Лемковині і має за задачу презентацию лемківской / русиньской авторской творчости. На заран на 18.00 год. просиме до «Гостинной Хыжы» в Высовій. В проґрамі доповіды др габ. Олены Дуць-Файфер і Петра Трохановского: о Матвію Астрябі, Несторі Репелі і Миколаю Буряку. На тогорічну Осін запрошено творців з Польщы, Словациі і Сербіі. З артистичным проґрамом выступит діточа ґрупа ансамблю Терочка та Дария Кузяк і Ольга Стариньска. В неділю од 15.00 год. Творча Осін буде продолжала в просторах Руской Бурсы в Ґорлицях. Орґанізаторами подіі сут Стоваришыня Лемків і Стоваришыя «Руска Бурса» в Ґорлицях.

Польковиці побудуют дальшый одтинок ґмінной дорогы

Ґміна Польковиці отримала з Урядового Фонду Розвитку Доріг понад 2 млн злотых дофінансуваня на будову одтинка ґмінной дорогы ул. Яна Павла ІІ. Покрыє оно 80% вартости інвестициі, котра находит ся в скоро розвиваючій ся части міста Польковиці Нижні. Одтикок позволит одблокувати рух на тій обшыри, але і поправит безпеку авт, пішых і біциґлистів. В рамках інвестициі побудуваны будут і постойовы місця, тротуар, роверова стежка, явит ся освітліня. Розвиток локальной сіти доріг то єден з пріотитетів Стратеґіі Розвитку Ґміны Польковиці 2021-2030. Плянуваный термін реализациі задачы то май-груден будучого рока.

Фестіваль Музикы Нацийональных і Етнічных Меншын Польской Республикы

В днях од 9. до 11. жолтня/октобра в варшавскым студентскым клюбі Гыбриды одбуде ся сема едиция Фестівалю Музикы Нацийональных і Етнічных Меншын Польской Республикы. Фестіваль єст формом артистичного дискурсу ріжных культур, котры через столітя розвивали ся на теренах Польской Республикы, презентує шор музичных традиций нацийональных і етнічных меншын давной і сучасной Польщы. Цілю подіі єст припомути і вказати влияня інчых нацийональности на формуваня ся польской культуры і достоменности. В першый і другій ден фестівалю буде мож почуту білоруску і украіньску музику, а в послідній ден фестівалю, середу 11. жолтня/октобра, зазвучыт лемківска, ормяньска і грецка музика. Лемківску музику запрезентує Оркєстра Святого Миколая. Концерты будут проходити од 19.00 год. Орґанізаторами фестівалю сут Фундация Культурной Едукациі MILO Art і Нацийональный Центр Культуры.