Сумар дня на 5. жолтня/октобра 2023 р.

Приносиме вам сумар медияльной ґрупы ЛЕМ.фм+ на ден 5. жолтня/октобра 2023 р.

Упамятнили першу ґраматику Русинів Войводины

29. вересня/септембра 2023 р. в просторах Заводу про культуру войводиньскых Русинів в Новым Саді одбыл ся округлый стіл з нагоды округлого ювілею – сотной річниці выданя Ґраматикы бачваньско-русиньской бесіды (ориґ. Граматика бачваньско-рускей бешеди). Ґраматику в 1923 р. в Сримскых Карловцях выдал єден з найвызначнійшых просвітителів Русинів на нижній земли Гавриіл Костельник. Округлый стіл орґанізувало Дружство про русиньскый язык, літературу і культуру. В рамках подіі своі рефераты выголосило парох науковців, котры занимают ся тым вариянтом русиньского языка, м.ін. Михайло Фейса ци Юлиян Рамач. Тоты рефераты будут пак выдрукуваны в 29. чыслі навкового часопису Studia Ruthenica. Як было повіджено вчас стрічы, Костельник усвідомлювал си, же як раз народна бесіда має быти том основом, на котрій має ся стандаризувати і кодифіковати язык бачваньско-сримскых Руснів.

Уж в тот вікенд Лемківска Творча Осін

Припоминаме, што в найблизшый вікенд видиме ся на ХХХІ Лемківскій Творчій Осени – камеральній подіі, яка каждого рока проходит на Лемковині і має за задачу презентацию лемківской / русиньской авторской творчости. Tогорічна Осін одбуде ся в суботу, 7. жолтня/октобра в Высовій в «Гостинній Хыжы». Подія зачне ся о 18.00 год. Доповід о Матвію Астрябі выголосят др габ. Олена Дуць-Файфер і Петро Трохановскій. Слово о Несторі Репелі – Петро Трохановскій, а доповід о Миколаю Буряку – др габ. Дуць-Файфер. На тогорічну Осін запрошено творців з Польщы, Словациі і Сербіі. В проґрамі передвиджено і артистичный проґрам в выконаню діточой ґрупы ансамблю Терочка і речіталь Дариі Кузяк і Ольгы Стариньской. Другій ден подіі одбуде ся в неділю, 8. жолтня/октобра в просторах Руской Бурсы в Ґорлицях. Початок о 15.00 год. Орґанізаторами подіі сут Стоваришыня Лемків і Стоваришыя «Руска Бурса» в Ґорлицях.

Мож одвидіти села в ґміні Польковиці

Як припоминат ґміна Польковиці, через найблизшый місяц дале тырвают Дни Одкрытых Двери в світлицях в селах на обшыри той ґміны. Першы зо стріч одбыли ся кінцьом вересня/септембра в парох селах. Вшыткы подіі орґанізує Центр Культуры в Польковицях. Стрічы в рамках Одкрытых Дни дают можлиіст дітям познати своі артистичны заінтересуваня, а родичам познати едукацийну оферту. Варштаты будут вести робітникы сельскых світлиц, котры ґарантуют позитивну атмосферу. Заранішні стрічы одбудут ся в світлици в Бєджыховій. Детальный проґрам стріч глядайте на сайті ґміны Польковиці.

Енді Варгол в Пряшові

До Музею Русиньской Культуры в Пряшові першыраз загосит творчіст Енді Варголя – поінормувала о тым дирекция інституциі на офіцияльным фанпейджы в сіти Facebook. Вернісаж выставы пн. «Од Андрия Вархолы до Andy Warhola i назад» одбуде ся 11. жолтня/октобра о 16.00 год. в музейных просторах в Пряшові. Наш музей орґанізує выставу во спілпрацы з Музейом Модерной Штукы Енді Варголя в Меджелабірцях. Кураторами выставы сут Мартін Цубяк – директор меджелабірского музею і Михал Быцько – умелецкій менадждер і куратор музею. Музичным гостьом подіі буде русиньскій оперный співак – Ігор Куцер.