«Слово» – 17-та неділя по Сошествії Святого Духа – неділя, 9.00 год.

Ісус Хрістос приходить до країв Тіру і Сідону. Там єдна жена Хананейка, котрой дівочку мукарив нечістый дух, коли увиділа Ісуса, кричіть за Ним: Розмилуй ся надо мнов. Но Він якбы не чув а поберав ся іти далше.

І ученикы Йому говорять: Выслухай єй, тадь кричіть за нами. А Ісус зосилує слово одвергнутя: Я єм посланый лем ку вівцям ізраільского дому, котры пропали. На то уж жена пришла ку Ньому і повіла: Момож мі. Но Ісус їй повів іщі твердше. Тото уж мало тоту жену цалком одрадити. А яке было то слово? Не є добрі взяти хліб од дітей а шмарити псам. Але тота жена одповіла: Маш правду. Но і псы їдять одробинкы зо стола їх панів.

А ту уж Ісус перед вшыткыма говорить їй: О, жено, велика є твоя віра! Най буде так, як хочеш. Тото є тым посолством того слова і про нас. Ісус видів од початку, што одбывало ся в сердці той жены. Видів наміріня, видів велику віру той жены. А через то якбы понижіня перед вшыткыма той жены і заганьбліня, но в реалности то было заганьбліня Жыдів, котры свідомы собі свойой прзналежности ку выбраному народу смотрили на іншых з погорджіньом як на псів.

Ісус їм указує, же формална приналежность і хваліня ся перед Богом нич не значать. Бо хоць зробив перед нима вельо чудесных діл, і так не увірили. А тоты, котрыма погорджовали, они увірили шіро.

Так і нам тото слово говорить, жебы сьме і мерьковали. Кедь ся хвалиме, же належыме Хрістови, тадь мы предсі похрещены, мы хрістіане. А може тыж смотриме так на тых, котры суть погане, не ходять до церькви. Але тото слово нам давать опрос: Яка є наша віра в конкретных сітуаціях жывота? Не зіставаме і мы лем на поверьху? Не є наша віра лем на словах а наше діла свідчать о опаку?

Най і нашы слова, і нашы діла жывота будуть такы, жебы сьме могли учути од Господа слова похвалы як тота жена: О, жено, велика є твоя віра і довіра в мене! Слава Ісусу Хрісту!

В неділю, 1. октобра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 1. октобра 2023 р. о 12.00 год. і 2. октобра 2023 р. о 2.00 год. за русиньскым часом.