«Слово» – 16-та неділя по Сошествії Святого Духа – неділя, 9.00 год.

Образный приклад днешнього євангелія говорить о чоловікови, котрый одходячі на далеку дорогу закликав своїх рабів і розділив їм своє богатство. Єдному дав пять талантів, другому два а третьому еден.

Першы двоє выхосновали тоты таланты і їх помножыли каждый подля міры. Єден здобыв пять, другый два. Третій раб не выхосновав принагоду і не здобыв про свого пана хоць лем єден талант.

Кедь ся пан тых рабів по довгім часі вернув, дав собі закликати і звідовав ся, як господарили. Тоты, котры выхосновали час і господарили, дістали нагодору: войди до радости свого пана. А третій іщі зачав обвиньовати свого пана, тадь я знав, же ты твердый чоловік, жнеш, де не сіяв, збераш, де не россыпав. Так я бояв ся і скрыв твоє злато. Ту маш, што є твоє. Тот чув слова: Шмарьте го вон до вонкашньой тмы…

Тото слово є адресоване ку нам. Нам Господь уділив таланты, різны дары. Но не каждому єднак, але подля способностей. Тоты таланты, Божы дары, маме помножыти в нашім жывоті так, же будеме ся з нима ділити, даме на служіня добру і другым. А коли Господь верне ся у славі, тогды учуєме ласкавы, любы слова: Добрый рабе і вірный… войди до радости свого пана.

Но, кедь собі повіме, пан не приходить, і будеме хосновати тоты дары не на славу Божу і на добро ближнього, але на своє самолюбство, пан прийде несподівано і повість слова: Рабе лукавзй і без хосна… шмарьте го вон… там буде плач і скреготаня зубів.

Або най нас мотівують слова войди, до радости свого пана, або напомянутя і страх зо свов, ты знав… чом не выхосновав час, коли будеме недбалы і лінивы і закопеме Божы таланты.

В неділю, 24. септембра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 24. септембра 2023 р. о 12.00 год. і 25. септембра 2023 р. о 2.00 год. за русиньскым часом.