Сумар дня на 22. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 22. вересня/септембра 2023 р.

50. засіданя Выбору про нацийональны меншыны і етнічны ґрупы

В середу 20. вересня/септембра в Братиславі одбыло ся ювілейне 50. засіданя Выбору про нацийональны меншыны і етнічны ґрупы Рады Влады Словацкой Республикы про людскы права, нацийональны менышыны і родову рівніст. Медже найважнійшыма пунктами засіданя была новелизация Закону о Фонді на підпору культуры нацийональных меншын і схваліня змін в статуті нацийонального выбору, што є повязане з тым, же в червци/юнію тр. словацкы власти признали вєтнамскій соспільности статус офіцияльной нацийональной меншыны на Словациі. Проблемом єст розділіня буджету так, жебы вєтнамска меншына достала грошы, але в новелизациі хотят згідно з конституцийом партиципувати і другы меншыны. Выбор на конец принял узнесіня, котрым жадат од Міністерства Культуры Словацкой Республикы покликати робочу ґрупу для рыхтуваня пропозициі новелизациі Закону о Фонді на підпору культуры нацийональных меншын, і повірил председі выбору до 29. вересня/септембра предложыти кандидатів за меншыны до той ґрупы. Окрем того было рішене, што завдякы результатам найновшого списуваня жытелів Русины будут мати о єдного члена выбору веце. Більше про засіданя чытайте в дописі на нашым портали.

Поляна музикы і світла на Парковій Горі

Як поінформувал бургомайстер Крениці Пьотр Рыба, PKL Польскы Кабельны Желізниці зробли дальшый крок до великых інвестиций на верху Парковой Горы. По проведіню адміністрацийного поступуваня новосандецкій староста затвердил проєкт заґаздуваня терену та архітектонічно-будовляный проєкт і дал позволіня на будову для PKL обнимаюче будову обєктів парковой архітектуры разом з електричном інсталяцийом, водопроводном інсталяцийом і внутрішньом комунікацийом, в рамках задачы пн. «Поляна музикы і світла на Парковій Горі».

Фестіваль русиньской співанкы і гумору в Старій Любовни

Русиньска Оброда на Словациі і Любовняньскій Освітный Центр просят на дальшу едицию культурно-соспільной акциі пн. «На фіґлярску ноту» – фестіваль русиньской співанкы і гумору. Подія одбуде ся уж заран, в суботу 23. вересня/септембра о год. 14.30 на трибуні перед окресным урядом в Старій Любовни. Фестіваль каждый раз проходит в інчый місцевости Пряшівской Руси. В проґрамі запрезентуют ся м.ін. Анна Сервицка і народна музика Яничковці, фольклорный ансамбль Барвінок, Ігор Латта – актор Театру Александра Духновича, співацка ґрупа Роса, Мариянна Железна і народна музика Замішковці ци Сестры Ковачовы і Самуель Прибыш. Подію з публичных середків підтримал Фонд на Підпору Культуры Нацийональных Меншын.

Концерты хоральной музикы в Устю Рускым і Бардийові

А о ден, в неділю 24. вересня/септембра о 13.00 год. в грекокатолицкій церкви св. Параскєвы в Устю Рускым буде мож выслухати концерту камерального хору Capella Musicae Antiquae Orientalis. Хор заспіват церковны творы композиторів XVIII-XX столітя. В тот сам ден по словацкій страні буде мож послухати хоральных композиций духовных і народных русиньскых пісен в выконаню хору Зоря з Устя Руского. Концерт одбуде ся в Бардиівскых Купелях, в концертовій сали готелю Астория о 16.00 год.