Сумар дня на 12. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 12. вересня/септембра 2023 р.

Інформацийна стріча в справі желізничного получыня Ліґниця-Ґлоґів

Припоминаме, што заран, 13. вересня/септембра, в сідибі Учельні Яна Выжыковского о 17.00 год. пройде інформацийна стріча в справі розбудовы желізничного получыня Ліґниця-Любін-Польковиці-Ґлоґів. То остатній цикль консультацийных стріч, котры будут частю документациі для проєкту пн. «Будова желізничной леніі Любін-Польковиці-Ґлоґів разом з розбудовом леніі но. 289 на одтинку Ліґниця-Рудна Ґвізданів». В рамках інвестициі плянувана єст будова новой леніі з Любіна до Польковиц і дале до місцевости Ґавожыці, при схоснуваню істнуючой леніі до Ґлоґова. Вчас стрічы власти запрезентуют рекомендуваный до реализациі проєкт выбраный на основі проведеных досліджынь і опіній жытелів заанґажуваных ґмін. Спосеред 5 вариянтів проєкту за найбарже корыстный узнано першу з опций, тзн. траса буде вела через економічну зону Польковиц і обшыр ґміны Радваниці і Ґавожыці. В рамках проєкту зреализуют і м.ін. будову новой леніі долгости 30 км, новых пристанків і желізничных стаций в Польковицях. Інвестиция закладат тіж будову другого тору на одтинку Ліґниця-Любін-Рудна-Ґвізданів.

Руты Увіте запрезентуют ся в Коросні

Етноцентр Коросняньской Землі просит в найблизшу суботу, 16. вересня/септембра, на концерт ансамблю Руты Увіте. Ґрупа, ведена Юлийом Дошном, свій репертуар операт на старых лемківскых піснях, записаных через Романа Райнфуса і Оскара Кольберґа, але не ограничат ся лем до лемківскых творів – співают тіж польскы, білорускы ци украіньскы пісні. На сцені в Коросні ансамбль запрезентує ся при акомпаніяменті Мирослава Боґоня, члена ансамблю Серенча. Подія зачне ся о 17.00 год., вступ на концерт дармо. Перед подійом мож буде взяти участ в варштатах співаня орґанізуваных через Етноцентр, дрібниці находят ся на сайті центра.

Рекордове чысло подорожных скорыстало з получыня «Влучыкій»

Вакацийный потяг «Влучыкій» реляциі Ясло-Крениця-Ясло однотувал того рока рекордову фреквенцию. Потяг зачал реґулярны курсы в 2021р. і уж товды получыня тішыло ся великом популярністю, што спричынило ся до повторного одкрытя реляциі в 2022 р., а пак в 2023 р. Як заанонсувано, вчас тогорічных вакаций з вікендового желізничного получыня скорыстало понад 5 тис. пасажерів, для порівнаня: в влони было то 3,5 тис. подорожных. При такых чыслах мож вірити, што «Влучыкій» о рік зас верне на торы.

Свято Рыджа в Высовій

Стары Здройовый Дім, Стоваришыня “На грибы” і Надлісництво Лося з Реґіональном Дирекцийом Державных Лісів в Кракові просят до Высовой взяти участ в 16. едициі Свята Рыджа. Тогорічна подія пройде 7. і 8. жолтня/октобра під гаслом «Po zdrowym lesie z rydzem biegać chce się». В пляні акциі находит ся м.ін. полюваня на рыджа, выстава «Грибы знаны і незнаны», прелекциі і варштаты, ци кулінарны варштаты. Вчас стрічу будут ся тіж презентувати выставці, котры прошены сут о пересланя своіх зголошынь до 27. вересня/септембра. Більше дрібниц находит ся на інтернетовым сайті свята.

Авторска стріча з Марийом Стжелецком

Выдавництво Libra просит до участи в двох стрічаз з Марийом Стжелецком, авторком книжок «Бескід без кіту» і «Никыфор». Стрічы пройдут 14. і 15. вересня/септембра, перша в Коросняньскій Публичній Бібліотеці, а друга в Містецкій Публичній Бібліотеці в Ґорлицях. Вчас подій участникы будут мочы купити книжкы авторкы.