Осередок культуры, бібліотека, але і місце для подорожуючых – на дворци в Команчы

Тырват ремонт желізничного дворця в Команчы. Буде мал не лем новый вид, але і додатковы функциі, попри тій основній, якым є місце для пасажырів потягів, бо штрека номер 107 зас є хоснувана.

Желізнична ленія Лупків-Нове Загіря з ХІХ ст. была частю Першой Угорско-Ґаліцийской Желізниці. До хоснуваня оддали єй в 1872 році, а о два рокы закінчыли будову тунелю Лупків-Полата, завдяку чому мож было через Лемковину і Пряшівску Русь подорожувати аж до Будапешту, а в другу страну – до Перемышля.

Назначене історийом

Ориґінальный будинок дворця был низшый як теперішній. Вчас ІІ світовой войны дворец по части знищыли. Німці, котры боронили ся перед налетами радяньскых штурмовых літаків помістили на горбі Верха над желізничном стацийом єдно зо позиций легкой артилериі. З двох совітскых штурмовників Іл-2, трафленых в вересни/септембрі 1944 р., єден розбил ся о убіч Верха. Горіючы фраґменты машыны скатуляли ся на будинок дворця і спричынили пожар.

По войні будинок выремонтували і повекшыли. Через рокы хоснували го породожуючы потягами, але з часом, желізниця стратила своє бывше значыня. В 2011 р. рух особовых потягів на леніі 107 завісили. В 2015 р. потягы вернули на желізницю, але в ограниченым закресі. Ленійом 107 протягом літа іздит вікендовый потяг Бєщадскій Жачок релqциі Ряшів-Загіря-Ряшів.

Єдно місце, вельо функций

Будинок дворця находит ся в центрі Команчы. Як раз, положыня в середині місцевости хотят схоснувати власти Команчы, котры переняли дворец од Польской Державной Желізниці. Мают плян, жебы перенести гын інституциі культуры, фунґуючы в Команчы, і дати місце новым.

Власти Команчы хотят, жебы в одремонтуваным будинку дворця основана была ізба артефактів з часів І світовой войны, котры нашли вчас штырьох сезонів археолоґічных бадань в реґіоні, веденых дослідниками Ягайлоньского Університету.

Своє місце найти має гын ґмінный осередок культуры, ґмінна бібліотека ім. Єжы Гарасимовича, а і пункт туристичной інформациі, котрого бракує в Команчы. В будинку мали бы іщы быти аж три комунальны мешканя.

Комплексовый ремонт дворця робленый є завдякы спілфінансуваню з проґраму Польскій Лад (60% коштів – решту покрыват Ґміна). Ціліст буде коштувала коло 3,2 млн зл.

Згідні з пляном, будинок оддадут до хоснуваня початком будучого рока.